pūrvato’py asya buddhi-pūrva-rasāntarasyātiśaya-vivakṣayā prakārāntareṇa tad eva darśayati—yathā veti |
pūrvavat parama-kautukinā śrī-kṛṣṇena śrī-rādhāyā manoparamārthaṁ sva-hasta-grathitaṁ vicitra-mālyam ekaṁ tasyai arpitaṁ, tatas tayā roṣāveśād yadṛcchayā dūrataḥ prakṣiptam api daiva-vaśāt tad-aṅgopary eva tat patitam |
tatas tad-abhighāta-jātāvasāda-vyājena svasya mahā-duḥkhitva-vyañjanayā tāṁ mahā-vyākulāṁ vidhāya tasyā mānonmūlanaṁ kṛtam iti dāma mālyaṁ puraḥ agrato dṛṣṭvā śrī-rādhayā kṣiptena tena dāmnābhihataḥ san hariḥ duḥkhīva, na tu vastuto duḥkhī, tad-anukārasya chadma-racitatvāt |
bhugne bhugnānanaḥ vakra-mukho bhūtvā mīlann eva saṅkucann eva niṣedivān upaviveśa, tatrāpi bhuvi bhūmāv iti tad-dhananasya mahā-vaivaśya-kāritvaṁ dyotitatm |
tatas tad-anantaraṁ sadyas tat-kṣaṇam eva vyagrayā vikalayā tayā rādhayā kartryā pāṇibhyāṁ dhṛtā gṛhītā kandharā grīvā yasya saḥ |
asyā rādhāyāḥ papau apibat |
atra sva-hasta-prakṣiptena dāmnā śrī-kṛṣṇasya vyathātireka-mananāt rādhāyāḥ saṅkocātiśayodayāt pūrva-padyād rasāntarasyādhikyam |
līlā-tāmarasāhato'nya-vanitā-niḥśaṅka-daṣṭādharaḥ kaścit kesara-dūṣitekṣaṇa iva vyāmīlya netre sthitaḥ | mugdhā kudmalitānanena dadhato vāyuṁ sthitā tasya sā bhrāntyā dhūrtatayā ca vepathumatī tenāniśaṁ cumbitā ||
[a. 72]
keyaṁ śyāmā sphurati sarale gopa-kanyā kim-arthaṁ prāptā sakhyaṁ tava mṛgayate nirmitāsau vayasyā | āliṅgāmūṁ muhur nārī-veśaṁ hriyam upayayau māninī yatra rādhā || [u.saṁ. 63]
ity apy udāhāryaṁ, buddhi-pūrva-sakhī-veṣa-vyājena sakhya-rasāntareṇaiva tasyā mānāpasaraṇāt ||