yathā— / sakhyādibhir upālambha-prayogo, yathā—
kartuṁ sundari śaṅkhacūḍa-mathane nāsminn upekṣocitā
sarveṣām abhaya-pradāna-padavī-baddha-vrate preyasi |
ity ālībhir alakṣitaṁ murabhidā bhadrāvalī bheditā
nāsāgre vara-mauktika-śriyam adhād asrasya sā bindunā ||
Translation
Commentary
Jīva Gosvāmī
Locana-rocanī
Viśvanātha Cakravartī
Ānanda-candrikā
māninīṁ bhadrāṁ kāścit śrī-kṛṣṇa-pakṣīyās tat-sakhya āhuḥ—kartum iti |
yadi śaṅkhacūḍam asau nāvadhiṣyat tadāsmākaṁ kā gatir abhaviṣyad iti bhāvaḥ |
bhadrāvalīti bhadrāyā eva saṁjñā ||
Viṣṇudāsa
Svātma-pramodinī
kartum iti bhadrāvalī-nāmnī kāñcid vraja-sundarīṁ jāta-mānām ālokya śrī-kṛṣṇo’nyopāyair asādhyam iva matvā tat-sakhī-vṛndam anunayātirekeṇa vaśaṁ vidhāya tad-dvāreṇa tām upālabhya tad-unnata-mānam upaśamayāmāseti vṛndā sa-kautukaṁ paurṇamāsī-purato varṇayati |
ity evaṁ-prakāreṇa murabhidā śrī-kṛṣṇena kartrā ālibhir dvāra-bhūtābhir bheditā buddhi-bhedenāpitā bhadrāvalī sā asrasya aśruṇaḥ bindunā nāsāgre nāsikāyāḥ śikhare vara-mauktikasya parama-sutāra-gaja-muktāyāḥ śriyaṁ śobhām iva śriyam adhāt dhṛtavatī |
pādāsakte suciram iha te vāmatā kaiva kānte san-mārga-sthe praṇayini jane kopane ko'parādhaḥ | itthaṁ tasyāḥ parjana-kathā kopa-vegopaśāntau bāṣpodbhedais tad anu sahasā na sthitaṁ na pravṛttam || [a. 68] ||