pūrva-padye lālasāṅkurāvasthāṁ tat-tac-ceṣṭitena sakhī-vitarka-dvārā udāhṛtya tat-paramāvadhi-rūpāvasthāṁ sphuṭam evodāharati—yathā veti |
dūrād iti pūrva-rāga-prasaṅge śrī-rādhāṁ saṅketa-sthāṁ vidhāya ta-sannidhau śrī-kṛṣṇāninīṣayā tad-antikam āsādya tenaiva pṛṣṭā śrī-viśākhā śrī-rādhāyās tat-saṅgamāya lālasodrekaṁ varṇayati |
anuṣaṅgataḥ anyārthato’pi kenacid uccārite tvan-nāma-dheyākṣare tava nāmnaḥ, kṛ ity eka-varṇe’pi śrutim ite varṇa-parisaraṁ prāpte sati madiro matta-khañjanaḥ tadvad īkṣaṇaṁ netraṁ yasyāḥ sā ity anena tan-nāmākṣara-śravaṇāt tad-āgamanāśaṅkayā jātautsukyena tadānīṁ sarvato dṛṣṭi-prakṣepān netrayoḥ cāñcalyātiśayatvaṁ dhvanitam |
sonmādaṁ yathā syāt tathā viruvatī phūtkurvatī kiṁ vā vaisvaryodgamena vikṛtaṁ lapantī satī muhuḥ śaśvad vepathuṁ dhatte kampam ālambate |
āḥ iti pīḍāyāṁ kopopalakṣitākṣepe vā |
anyat kiṁ vā kathanīyaṁ vaktavyam |
daivāt akasmāt asite kṛṣṇa-varṇe varāmbhodhare sundara-kānti-puñjāḍhya-sajala-payode dṛṣṭe sati taṁ varāmbhodharaṁ parirabdhum āliṅgitum utsuka-matir utka-dhīḥ satī pakṣa-dvayīm icchati |
sonmādam ity asyātrāpi sambandhaḥ |
megha-darśane’pi kṛṣṇa-buddhyā tad-āliṅganādhyavasāyāt |
tvām añjanīyati phalāsu vilokayantī tvāṁ śṛṇvatī kuvalayīyati karṇa-pūram | tvāṁ pūrṇimā-vidhu-mukhī hṛdi bhāvayantī vakṣo-nilīna-nava-nīlamaṇiṁ karoti || [padyā. 186] iti |
paritaḥ parivartitaṁ hriyā kalita-bhrūkuṭi-kuñcitekṣaṇam | madhura-dyuti-rādhikā-mukhaṁ paripāsyāmi kadā balād aham || [la.mā. 4.33] ||