asya mādanasyānubhāvaṁ dig-darśanatayā kiñcid āha—atreti |
atra mādanākhye mahā-bhāva-bheda-viśeṣe ayogya anucite sthāne’pi prabalerṣyāyāḥ prauḍhākṣāntarvidhāyitā kāritvaṁ sadā sarvadā bhoge sambhoge’pi kriyamāṇe tat tasya śrī-kṛṣṇasya gandha-mātrasya ye ādhārāḥ pātrāṇi teṣāṁ stavādayaḥ ādi-śabdena tat-praśaṁsā tad-abhivādanādayaś ca jñeyāḥ ||
govardhanopari nīla-maṇḍapikā-ghaṭṭe dāna-līlā-kautukinā śrī-kṛṣṇena dāna-cchalenāvaruddhā śrī-rādhā asya vakṣasi vana-mālāyāḥ saubhāgyātirekam anubhūya tad-asahamānā lalitāyāḥ puratas tāṁ nīcaiḥ serṣyam upālabhate |
he vana-māle ! vraja-hariṇa-netrābhir asmābhiḥ sārdhaṁ vidveṣaṁ vairaṁ kim iti katham iva racayasi vidadhāsi ? kim-bhūtābhiḥ ? viśuddhābhiḥ parama-sarala-cittābhir iti vidveṣāviṣayatvaṁ sūcitam |
upakāriṇi viśrabdhe śuddha-matau yaḥ samācarati pāpam | taṁ janam asatya sandhaṁ bhagavati vasudhe kathaṁ vahasi ||
[hi.u. 1.80]
tatrāpi addhā sākṣād eva, na tu parokṣaṁ paramparayā vā |
tatrāpi aniśaṁ nirantaram eva, na ca sakṛd eva |
nanu devi mayā te kim apakṛtaṁ yata īdṛśaḥ kalaṅko may vṛthārpyate ? tatrāha—tṛṇīti |
yā tv asmān tadaikāśayaiva tyakta-sarvārthāḥ tṛṇīkurvatī avajñayā tṛṇam iva manvānā agharipoḥ śrī-kṛṣṇasya vapuḥ samagraṁ śarīram eva idaṁ dṛśyamānam iti vidveṣasyāddhātvam |
āśikham āpādam iti ca pada-dvayaṁ karma-pravacanīya-yukte dvitīyā [pā. 2.3.8] iti abhivyāpty-arthe dvitīyā |
karma-pravacanīyatvaṁ tu, āṅ maryādā-vacane [pā. 1.4.89] ity āṅas tat-saṁjñatvam |
tatra vacana-grahaṇād abhivyāptau ceti vyākhyāya ākumāraṁ vaśas tava pāṇininety udāhṛtatvāc ca pariṣvajya āliṅgya mahati vistīrṇe hṛdaye viharasi svaira-līlayā yatra yatrāyaṁ gacchati, tatra tatrāsya saṅgaṁ kṣaṇam apy amuñcantī āndolana-khelayā vicarasi |
aniśaṁ iti addheti ca pada-dvayam atrāpi yojyam |
ayi murali viśāla-cchidra-jālena purṇā laghur atikaṭhinā tvaṁ granthilā nīrasāsi | tad api bhajasi śaśvac cumbanānanda-sāndraṁ hari-kara-parirambhaṁ kena puṇyodayena ||
[vi.mā. 4.7]
lalita-mādhave ca, yathā—
vicitrāyāṁ kṣauṇyām ajaniṣata kanyāḥ kati na vā kaṭhorāṅgī nānyā nivasati mayā kāpi sadṛśī | mukundaṁ yan muktvā samayam aham adyāpi gamaye dhig astu pratyāśām ahaha dhig asūn dhiṅ mama dhiyam ||
[la.mā.2.22]
a piasi gobiāṇaṁ peaṁ kaṇhassa ahara-pallaaṁ murali | ṇia-para-bibeakusalā ammo ṇo honti sacchidāḥ ||
[a.kau. 3.28]