saurabha-lobhena caraṇa-tale patantam api bhramaram |

nanu lakṣmī-koṭi-nirmañchanīya-caraṇa-nakha-dyute devi satyaṁ tvayy aparāddha eva śrī-kṛṣṇas tasmāt tvaṁ kṛpayaiva kṣamasveti praṇamantaṁ taṁ matvāha—visṛjeti |

śirasi dhṛtaṁ mama pādaṁ visṛja tyaja ito dūrībhavety arthaḥ |

vedmy aham iti |

lakṣmy-ādikeva nāhaṁ pratāryeti bhāvaḥ |

mukundāt sakāśād abhyetya cāṭukāraiḥ priyokti-racanā-rūpair dautyair dūtya-karmabhir anunaya-viduṣas tasmād anunaya-prakāraṁ śikṣitavatas tava sarvaṁ śīlādikam ahaṁ vedmi |

karmaṇi vā ṣaṣṭhī |

tvāṁ vedmīty arthaḥ |

nanu svāmini tvat-prāṇa-koṭy-adhikena tena saha vigraheṇālaṁ pratyuta mayā tīrthena sandhir eva kartuṁ yujyata iti tatrāha—sva-kṛte tad-arthaṁ visṛṣṭāni tyaktāni apatyāni ca patayaś ca anya-lokāś ca mātā-pitrādayaś ca yābhis tatra vā sa muralī-vādana-samaye’ntar-gṛha-niruddha-gopībhir apatyāni tyaktāni tadānīṁ tāni tyakvaivābhisṛtatvāt |

asmābhis tu patayaḥ dhanyādi-kanyābhiḥ pitrādaya iti yathā-sambhavaṁ jñeyam |

tā gopīr yo’sṛjat |

kīdṛśaḥ ? akṛta-cetāḥ, na vidyate kṛte upakṛte ceto yasya saḥ |

akṛtajña ity arthaḥ |

nanv aho īdṛśe’smin kaṭhore kiṁ nu sandheyaṁ sandhātum arham |

api tu naivety arthaḥ |

atra pūrvārdhe solluṇṭhā ākṣepa-mudrā |

uttarārdhe’kṛtajñatā |

ādi-śabdān nirdayatva-para-drohitva-prema-śūnyatvāni ||

(191)