anurāgasyānubhāvān āha—paraspara-vaśībhāva iti |
premādiṣu nāyakasyaiva vaśībhāvaḥ spaṣṭo bhavet |
nāyikāyās tu lajjāvahitthādibhir avaśībhāva eva tatra tatra suraso’pi sa evocyate |
anurāge tu tṛṣṇādhikyād avahitthā-garvāsūyāder avakāśābhāvān nāyikāyā api spaṣṭa eva vaśībhāva ity atraiva paraspara-vaśībhāvo vyakto bhaved ujjvala-rase |
dāsyādi-rase tv avahitthādi-sañcāri-bhāvābhāvāt premārambham ārabhyaiva paraspara-vaśībhāvo bhavet |
sādhavo hṛdayaṁ mahyaṁ sādhūnāṁ hṛdayaṁ tv aham | mad-anyat te na jānanti nāhaṁ tebhyo manāg api ||
[bhā.pu. 9.4.68]
bhagavato bhakta-vaśyatā bhaktānām api bhagavad-vaśyatā sarva-śāstra-prasiddhaiva ||