pūrvaṁ sādhvasonmuktatva-pradhāna-sakhyam udāhṛtya svādhīnatā-mayatva-pradhāna-sakhyam āha—yathā veti |
naraka-vadhānantaram aditeḥ kuṇḍala-maṇi-parvatārpaṇārtham indra-nagaram āptena śrī-kṛṣṇena saha gatāyāḥ satyabhāmāyāḥ kṛṣṇaṁ prati prārthanā |
yadi te tava tat prasiddham asādhāraṇaṁ vā vacaḥ satyaṁ, tat kim ? ity apekṣāyām āha—satyā satyabhāmā sarvābhyo mahiṣībhyo’tyartham atiśayaṁ yathā syāt tathā priyā premāspadam iti, tadā tarhi taruḥ pārijāta-nāmā ayam iti sākṣād darśayitvā taṁ prerayati—nīyatām iti |
nanu kim anenaikena vṛkṣeṇa ? dvārakāyām ito’pi mahā-prabhāvāḥ kalpa-vṛkṣa-jātīyāḥ subahutarāḥ santi ? tatrāha—mad-geheti |
ayaṁ bhāvaḥ—dvārakāyāṁ santy eva, kintu madīyaṁ yad asāpatnyaṁ gehaṁ, tasya niṣkuṭaḥ upavanaṁ, tasya yo’rthaḥ prayojanaṁ viharaṇa-krīḍā-puṣpādy-ādānaṁ, tasmai taṁ niṣpāditum ity arthaḥ ||