tal-lakṣaṇaṁ, yathā— sarūpayor bhinnayor vā sandhiḥ syād bhāvayor mūrtiḥ || [bha.ra.si. 2.4.235] tatra sarūpayoḥ sandhiḥ, tal-lakṣaṇaṁ yathā tatraiva— sandhiḥ sarūpayos tatra bhinna-hetūtthayor mataḥ || [bha.ra.si. 2.4.236] iti |
kadācit śrī-kṛṣṇasya prathamāvaloke labhamāne tadaiva daiva-vaśatas tatra patiṁmanyasyābhimanyor api darśane jāte sati iṣṭāniṣṭa-darśana-janya-jāḍyataḥ stabdhāṅgīṁ śrī-rādhāṁ prekṣya vṛndā sa-khedam uvāca |
cirād evābhīṣṭā abhilaṣitā prekṣā sandarśanaṁ yasya tasmin danuja-damane śrī-kṛṣṇe tathā patyau ca patiṁ-manyābhimanyau dṛśoḥ padaṁ locanayoḥ padavīṁ vindati labhamāne sati |
kimbhūte patau ? ardha-sphuṭam asamyag-vyaktaṁ vaco yasya tasmin |
punaḥ kimbhūte ? raktā lohitā tviṭ kāntir yasya tasmin |
ruṣeti ubhayatrāpi hetuḥ |
iyam ambhoja-vadanā kamala-mukhī śrī-rādhā niṣpandāṅgī stabdha-gātrī babhūva |
keva ? āvaṣṭambhasya svarṇasya pratikṛtir iva svarṇa-nirmita-pratimeva |
pratikṛti-sādṛśye hetuḥ—nimiṣasya yat kalanaṁ spandanaṁ tena unmukte virahite nayane yasyāḥ sā ||