gaurava-dākṣiṇyābhyāṁ, yatheti |
candramukhī-nāmnyā kayācid vraja-devyā sva-hasta-kauśalena nirmāya śrī-kṛṣṇāya dattāṁ mālāṁ tena punas tad-vipakṣa yūtheśvaryai vitīrṇām ālokyāntaḥ-suṣṭhu kṣubdhāyā api tasyā kṛṣṇa-viṣayaka-gauravādinā sva-manaḥ-santāpa-saṅgopanam ālokya vṛndā vismitā kāñcit tat-sakhīṁ prati prāha—viluṭhantīṁ krīḍā-rabhasena visrastāṁ pratipakṣasya vipakṣa-yūtheśvarāyāḥ, keśa-pakṣe, praśasta-kuntale, aghamardane śrī-kṛṣṇa-viṣaye, athavā agha-mardanena kṛtā svasyāṁ yāḥ ādarormayaḥ gaurava-paramparās tābhiḥ sthagitā stabdhā satī tūṣṇīm avāk babhūva |
pūrva-rasāmṛte asyā anyadāpi kiñcit prapañcitam asti, yathā—
hetuḥ kaścid bhavet kaścid gopyaḥ kaścana gopanaḥ | hetutvaṁ gopanatvaṁ ca gopyatvaṁ cātra sambhavet | prāyeṇa sarva-bhāvānām ekaśo’nekaśo’pi ca || [bha.ra.si. 2.4.127-128] 70||