asya lakṣaṇaṁ yathā tatraiva— cittasya sambhramo yaḥ syād āvego’yaṁ sa cāṣṭadhā |
priyāpriyānala-marud-varṣotpāta-gajāritaḥ ||
priyotthe pulakaḥ sāntvaṁ cāpalyābhyudgamādayaḥ |
apriyotthe tu bhū-pāta-vikrośa-bhramaṇādayaḥ ||
vyatyasta-gati-kampākṣi-mīlanāsrādayo’gnije |
vātaje’jāvṛti-kṣipra-gati-dṛṅ-mārjanādayaḥ ||
vṛṣṭijo dhāvana-cchatra-gātra-saṅkocanādi-kṛt |
autpāte mukha-vaivarṇya-vismayo’kaṇṭhitādayaḥ ||
gāje palāyanotkampa-trāsa-pṛṣṭhekṣaṇādayaḥ |
arijo varma-śastrādi-grahāpasaraṇādi-kṛt ||
[bha.ra.si. 2.4.59-63] iti |
sa priya-darśanajo yatheti |
śrī-rādhāyā utkaṇṭhodrekam avagatya kundalatayā jaṭilā-nideśam ādāya sūrya-pūjā-vyājena saṅgamitaṁ brāhmaṇa-baṭu-veśaṁ śrī-kṛṣṇaṁ dṛṣṭvājñāta-tattvāpi śrī-rādhā sahaja-nija-bhāvāvalambane’nya-veśācchanno’pi tasmin mānasāsaktim ājñāya vitarkayati |
nirātaṅko’śaṅkaḥ mudira-dyutiḥ jalada-prabhaḥ kutaḥ kasmād deśāt prāpta āgataḥ ? mādyan yo mataṅgajo dviradas tasya bahutvaṁ vṛtti-bāhulyāt |
viluṇṭhayati corayati mama dhṛtir eva dhanaṁ cetaḥ-koṣaḥ koṣāgāraṁ tasmāt |
lalita-mādhava evānyad api śrī-kṛṣṇa-vākyena— sāci-locana-raṅgita-bhaṅgī- vāgurām iha vitatya mṛgākṣī |
rādhikeyam adhika-svara-bhaṅgaṁ drāg babandha mama citta-kuraṅgam ||
[la.mā. 2.21] govinda-līlāmṛte ca— gambhīro'pi sthira-matir ativrīḍito nirvikārī yaḥ kṛṣṇas te subala savayāḥ sāmprataṁ paśya so'yam |
śrī-rādhāyāḥ sama-sa-vayasaḥ śrī-mukhāloka-jātair bhāvair lolaḥ smara-vivaśa-dhīḥ sambhramād bambhramīti ||