para-krauryād, yathā vidagdha-mādhave (5.23)— / atha trāsaḥ, sa taḍitā, yathā—
sphūrjite nabhasi bhīrur udyatāṁ
vidyutāṁ dyutim avekṣya kampitā |
sā harer urasi cañcalekṣaṇā
cañcaleva jalade nyalīyata ||
Translation
Commentary
Jīva Gosvāmī
Locana-rocanī
tal-lakṣaṇaṁ— trāsaḥ kṣobho hṛdi taḍid-ghora-sattvogra-nisvanaiḥ [bha.ra.si. 2.4.54] iti |
gātrotkampī manaḥ-kampaḥ sahasā trāsa ucyate |
pūrvāpara-vicārotthaṁ bhayaṁ trāsāt pṛthag bhavet ||
Viśvanātha Cakravartī
Ānanda-candrikā
trāso’kasmād vidyud-ādibhir manasaḥ kampaḥ pūrvāpara-vicārotthā śaṅkā saivātisāndrā bahulā bhayam iti trāsa-śaṅkā-bhayānāṁ bhedaḥ |
rūpa-mañjarī kundavallī pratyāha—sphūrjita iti |
nabhasi ākāśe sphūrjite megha-garjanena śabdite sati udyatām udgatānām |
sā rādhā cañcaleva vidyud iva ||
Viṣṇudāsa
Svātma-pramodinī
tasya lakṣaṇaṁ yathā tatraiva— trāsaḥ kṣobho hṛdi taḍid-ghora-sattvogra-nisvanaiḥ |
pārśvasthālamba-romāñca-kampa-stambha-bhramādi-kṛt ||
krīḍā-kuḍuṅge śrī-kṛṣṇena saha viharamāṇāyāḥ śrī-rādhāyāḥ santanita-vidyut-prakāśaja-trāsena kṛṣṇāṅka-līnatām ālokya lalitā varṇayati |
nabhasi ākāśe sphūrjite megha-garjanena śabdite udyatām udgatāṁ vidyutāṁ taḍitāṁ dyutiṁ prabhāṁ sā rādhā cañcalekṣaṇeti tadānīṁ trāsena netrasya cāñcalyātiśayāt |
kasmin keva ? jalade meghe cañcaleva taḍid iva nyalīyata līnā babhūva ||