Premabase · Śrīmad Bhāgavatam · Canto 1 · Chapter 19
Show
SanskritHindiEnglish
Script
IASTदेवनागरीবাংলা
Commentary
ŚrīdharaJīvaViśvanāthaBaladeva
ŚB 1.19.24
← 1.19.231.19.25 →
tataś ca vaḥ pṛcchyam imaṁ vipṛcche
viśrabhya viprā iti-kṛtyatāyām |
sarvātmanā mriyamāṇaiś ca kṛtyaṁ
śuddhaṁ ca tatrāmṛśatābhiyuktāḥ ||
Translation
— translation pending —
Commentary
Śrīdhara Svāmī
bhāvārtha-dīpikā
pṛcchyaṁ praṣṭavyam |
viśrabhya viśvāsaṁ kṛtvā |
evaṁ kartavyam ity asya bhāva iti-kṛtyatā tasmin viṣaye |
sarvātmanā sarvāvasthāsu yat kṛtyaṁ, viśeṣataś ca mriyamāṇais tac ca śuddhaṁ pāpa-saṁparka-rahitam āmṛśata vicārayata ||
Jīva Gosvāmī
krama-sandarbhaḥ
viśrabhyeti, kṛṣṇāṅghri-sevām evaita upadekṣyantīty abhiprāyāt |
śuddham iti kaniṣṭha-madhyama-sādhana-miśratā-rahitaṁ sarvottamam ity arthaḥ |
tac ca kṛṣṇāṅghri-sevā-rūpam eveti gūḍho’bhiprāyaḥ ||
Viśvanātha Cakravartī
sārārtha-darśiṇī
imaṁ vo yuṣmākam apy anugrahaṁ vipṛcche—kim-ākāraḥ sa cikīrṣitavya iti pṛcchāmi |
pṛcchyaṁ praṣṭum arham, tatraivādhyavasāyārtham iti bhāvaḥ |
viśrabhya tatraiva me viśvāso bhāvīti jānīteti bhāvaḥ |
itikṛtyā evaṁ kartavyās tapo-yoga-jñānādayas teṣāṁ bhāva iti-kṛtyatā |
tasyāṁ satyāṁ mriyamāṇair janais tapo-yogādīnām evaṁ-kartavyatve sati sarvātmanā mama yatra śuddhaṁ kṛtyam, atra āmṛṣata vicārayata—sarvaika-vākyatayā niścitya kartum ājñāpayateti bhāvaḥ ||
Baladeva Vidyābhūṣaṇa
vaiṣṇavānandinī
imaṁ vo'nugrahaṁ vipṛcche, kīdṛśaḥ sa mayi cikīrṣitavya iti vipṛcchāmi |
pṛcchyaṁ tatraivādhyavasāyārthaṁ praṣṭuṁ yogyam ity arthaḥ |
viśrabhya tatraiva me viśvāso bhāvīti bodhyam ity arthaḥ |
iti kṛtyā evaṁ karma-tapo-yogādayaḥ kāryās teṣāṁ bhāva iti-kṛtyatā tasyāṁ viṣaye sarvātmanā sarvāsvavasthāsu yat kṛtyaṁ viśeṣato mriyamāṇaiś ca yat, tac ca śuddhaṁ hiṁsā-śūnyam āmṛśata vicārayata |
sarvaikamatyā niścityānuṣṭhātum ājñāpayeteti bhāvaḥ ||
← 1.19.231.19.25 →