prāyopaveśaś cāyaṁ tasyām amartya-nadyām eva yuktaḥ |
yatas tasyāṁ tad-abhīṣṭasya śrī-kṛṣṇasya sambandhaḥ sarveṣāṁ pāvanatvaṁ ca sphuṭaṁ dṛśyata ity āstāṁ tasya brāhmaṇāparādha-kalūṣa-bhītasya śrī-kṛṣṇasyāṅghri-sevām eva ca sarvādhika-puruṣārthatayā lipsor vārtā sarvasyāpi jīvasya tatrāpy āsanna-maraṇasya saivāśrayituṁ yogyety āha—yā vai iti |
yā vai tādṛśatvena svayaṁ prasiddhāḥ |
punar lasat-śriyas tadānīṁ pracuratayā vṛndāvana-jātā yās tulasyas tābhir vimiśrāḥ pūrvaṁ nimiśrī-bhūtā aikyaṁ prāptā yā vṛndāvana-sthitāḥ svayaṁ-bhagavataḥ śrī-kṛṣṇasyāṅghri-reṇavas tair abhyadhikaṁ yamunā-rūpam ambu |
tasyāpi netrī voḍhrīty arthaḥ |
abhyadhikatvaṁ coktam ādi-vārāhe—
gaṅgā-śata-guṇā pūṇyā māthure mama maṇḍale | yamunā viśrutā devī nātra kāryā vicaraṇā ||
jala-pravāha-rūpā gaṅgā hy atra voḍhrī |
tato bhinām evopapadyata iti |
netrīti sadaiva tan-nayanaṁ labhyata iti ca tathā vyākhyātam |
kṛṣṇa-śabdaś ca rūḍhyā śrī-gopāla evādhikaṁ prasiddha iti tu tathā vyākhyātam eva |
abhede hi tādṛg ambu-rūpety evāvakṣyad iti ||