Premabase · Śrīmad Bhāgavatam · Canto 1 · Chapter 18
Show
SanskritHindiEnglish
Script
IASTदेवनागरीবাংলা
Commentary
ŚrīdharaJīvaViśvanāthaBaladeva
ŚB 1.18.21
← 1.18.201.18.22 →
athāpi yat-pāda-nakhāvasṛṣṭaṁ
jagad viriñcopahṛtārhaṇāmbhaḥ |
seśaṁ punāty anyatamo mukundāt
ko nāma loke bhagavat-padārthaḥ ||
Translation
— translation pending —
Commentary
Śrīdhara Svāmī
bhāvārtha-dīpikā
athety arthāntare |
yasya pāda-nakhhād avasṛṣṭaṁ niḥsṛtam api viriñcenopahṛtaṁ samarpitam arhaṇāmbho’rghodakam īśa-sahitaṁ jagat punāti |
viriñcopahṛtaṁ seśam iti ca tayor apy upāsakatvam uktam |
tasmān mukunda-vyatiriktaḥ ko nāma bhagavat-padasyārthaḥ |
sa eva sarveśvara ity arthaḥ ||
Jīva Gosvāmī
krama-sandarbhaḥ
tasya cānanta-guṇasya mahatsv abhivyaktatvaṁ darśayati—atheti |
seśaṁ punātīty atreśasyāpi pavitrīkaraṇam akhaṇḍatama-guṇādhiṣṭhānatve’pi tad-āveśa-khaṇḍanaṁ jñeyam ||
[paramātma-sandarbha 17]
Viśvanātha Cakravartī
sārārtha-darśiṇī
atha ity arthāntare |
yat-pāda-nakhāvasṛṣṭaṁ niḥsṛtam api viriñcenopahṛtaṁ samarpitam arhaṇāmbhaḥ arghyodakam īśo mahādevas tat-sahitaṁ sarvaṁ jagat punāti tasmān mukunda-vyatiriktaḥ ko nāma bhagavat-padasyārthaḥ sarveśvaraḥ sa evety arthaḥ |
evaṁ ca jagati sarvotkṛṣṭā lakṣmī-brahma-śivā eva tat-padaṁ sevamānās tasya mahotkarṣa sūcayantīti vākyārthaḥ ||
Baladeva Vidyābhūṣaṇa
vaiṣṇavānandinī
tasya sarveśvaratvād eva sarvān vihāya lakṣmīs tam eva sevata ity āha— athāpīti |
viriñcenopahṛtam arpitam arhaṇānto'rghodakaṁ kartṛ yasya pāda-nakhād avasṛṣṭaṁ nirgataṁ sat seśaṁ sarudraṁ jagat punāti, tasmān-mukundādanyatamo loke bhagavat-padasyārthaḥ ko nāma? tathā ca lakṣmī-brahma-rudrāṇāṁ sarvotkṛṣṭānāṁ tat-pada-sevakatvāt sa eva sarveśvara iti ||
← 1.18.201.18.22 →