Śrīmad Bhāgavatam 1.17.23

Show

SanskritHindiEnglish

Script

IASTदेवनागरीবাংলা

Commentary

ŚrīdharaJīvaViśvanātha

ŚB 1.17.23

athavā deva-māyāyā nūnaṁ gatir agocarā |
cetaso vacasaś cāpi bhūtānām iti niścayaḥ ||

Translation

— translation pending —

Commentary

Śrīdhara Svāmī

bhāvārtha-dīpikā

yad vā, ajñānād apy akathanaṁ bhavatīty āha—athaveti |

devasya māyāyā gatir vadhya-ghātaka-lakṣaṇā vṛttir bhūtānāṁ cetaso vacasaś cāgocarā sujñeyā na bhvatīti niścaya ity arthaḥ ||

Jīva Gosvāmī

krama-sandarbhaḥ

nanu yatra kutracid dharme viśeṣatas tu sarva-dharma-rakṣāyāṁ pramāṇīkṛtasya yathārtha-vacanam eva yuktam |

tathā ca vayam īśvara-vādino’pi taṁ na vijānīmā iti katham uktavantas tatrāha—athaveti |

tasmād adhunā deva-māyā-kṛte kaleḥ prabhāve tavāpy ayaṁ saṁśayo yukta iti bhāvaḥ |

deva-padaṁ tv atra tathāpi dyotamānatvāt tasya māyā-doṣāspṛṣṭatva-nigamanārthaṁ kṛtam ||

Viśvanātha Cakravartī

sārārtha-darśiṇī

athaveti |

tvayā sarvam uktam evety arthaḥ |

deva-māyety ādinā apratarkyād iti tad-uktam anumoditam |

devasya bhagavato māyāyāḥ sarva-jagat-pālana-saṁhāra-kāriṇyā gatiḥ bhūtānāṁ cetaso’gocarā iti apratarkyety arthaḥ |

vacaso’gocarā iti anirdeśyety arthaḥ |

māyāyās tac-chaktitvāt sa devaḥ pālana-saṁhāra-lakṣaṇe sukha-duḥkhe bhūtebhyaḥ kathaṁ dadātīti jñātuṁ vaktuṁ ca kaḥ śaknotīty arthaḥ ||