Premabase · Śrīmad Bhāgavatam · Canto 1 · Chapter 15
Show
SanskritHindiEnglish
Script
IASTदेवनागरीবাংলা
Commentary
ŚrīdharaJīvaViśvanāthaBaladeva
ŚB 1.15.47-48
← 1.15.461.15.49 →
tad-dhyānodriktayā bhaktyā viśuddha-dhiṣaṇāḥ pare |
tasmin nārāyaṇa-pade ekānta-matayo gatim ||
avāpur duravāpāṁ te asadbhir viṣayātmabhiḥ |
vidhūta-kalmaṣāsthānaṁ virajenātmanaiva hi ||
Translation
— translation pending —
Commentary
Śrīdhara Svāmī
bhāvārtha-dīpikā
kathaṁ-bhūte pade ? vidhūta-kalmaṣāṇām āsthānaṁ nivāsa-sthānaṁ yat, tasmin |
virajenātmanaiva gatiṁ prāpur na tu ṣoḍaśa-kalena liṅgena |
gater vā viśeṣaṇam |
virajenātmanaivāvasthāna-rūpāṁ gatiṁ te vidhūta-kalmaṣāḥ prāpur iti ||
47-48||
Jīva Gosvāmī
krama-sandarbhaḥ
nārāyaṇaḥ śrī-kṛṣṇaḥ |
punar gatim eva viśinaṣṭi—vidhūta-kalmaṣaṁ yathā-sthānaṁ nitya-śrī-kṛṣṇa-prakāśāspadaṁ tadīyā sabhā |
ātmanā sva-śarīreṇaiva |
tatra hetuḥ—virajena aprākṛtena |
hi-śabdo’sambhavanā-nivṛtty-arthah ||
47-48||
[prīti-sandarbha 273]
Viśvanātha Cakravartī
sārārtha-darśiṇī
viśuddhā jñāna-yogādy-amiśrā dhiṣaṇā buddhir yeṣāṁ te |
ata eva ekānta-matayaḥ |
gatiṁ kīdṛśīṁ ? vidhūta-kalmaṣāṇām āsthānaṁ nivāsa-sthānam |
yad vā, vidhūta-kalmaṣāṇām āsthānaṁ sabhā sudharmābhidhānā yatra, tat kṛṣṇa-dhāmaiva gatim avāpuḥ |
kena prakāreṇa ? ity ata āha—virajena nirmalena guṇa-maya-dharmendrādy-aṁśa-rāhityād aprākṛtena ātmanā sva-śarīreṇaiva, na tu deha-bhaṅgenety arthaḥ ||
47-48||
Baladeva Vidyābhūṣaṇa
vaiṣṇavānandinī
viśuddhā mārjitāḥ sukhaiśvarya-vāñchātopanītā dhiṣaṇā yeṣāṁ te, tat-sevā-sukhaika-niṣṭha-dhiya ity arthaḥ |
pare śreṣṭhe tasmin nārāyaṇa-pade vadaryāśrame gatiṁ prāpuḥ ||
kīdṛśīṁ gatim ? ity āha—vidhūta-kalmaṣāṇāṁ nitya-pārṣadānām uddhavādīnām āsthānaṁ sudharmākhyā sabhā yatra tat kuśasthalī-nāmakaṁ kṛṣṇa-dhāmety arthaḥ |
kena prakāreṇa ? ity āha—virajena nirmalena guṇamaya-dharma-marud-indrādy-aṁśa-virahad amāyikena ātmanā sva-sva-vigraheṇaiva, na tu tad-bhaṅgenety arthaḥ ||
← 1.15.461.15.49 →