yādavādīnām antima-daśā-śravaṇena viṣīdataḥ śaunakādīn āśvāsayan siddhānta-rahasyam āha—yayeti |
yayā yādavādi-tanvābhuvaḥ sva-pāda-bhūtāyā [sva-pāda-mūlāyāḥ] bhāraṁ kaṇṭakena sūcy-agreṇa kaṇṭakam iva aharat, tām eva tanuṁ vijahau |
devadatto vasanaṁ vijahāv itivat sva-saṅgād vicyutīcakārety arthaḥ, na tu yayā nityaṁ krīḍati tām apīti bhāvaḥ |
tena aṁśāvataraṇa-samaye ye devā nitya-bhūteṣu praviṣṭāḥ, te eva tebhyo yoga-balena niṣkāsya prabhāsaṁ gamitāḥ, tad-deha-tyāgaṁ lokān māyayaiva darśayatā bhagavatā madhu-pānānantaraṁ deva-rūpīkṛtya svargaṁ prāpayāmāsire ity ekādaśānta-vyākhyānusṛtyā jñeyam |
nitya-lilā-parikarā yādavās tu prāpañcika-lokālakṣitāḥ śrī-kṛṣṇena samaṁ dvārakāyām eva yathā-pūrvam eva khelantīti bhāgavatāmṛtokta-siddhāntād avagantavyam |
bhū-bhāra-bhūtā asurā yādavādi-rūpā devāś ceti dvayam īśituḥ parameśvarasya samam eva |
kintu dṛṣṭānte kaṇṭakatvena sāmye’pi karaṇa-bhūtasya sūcy-agrasya upakārakatvenāntaraṅgatvaṁ karma-bhūtasya kaṇṭakasyāpakārakatvena sāmye’pi bahir aṅgatvam ity api jñāpitam |
sūcy-agre kṣudra-śatrau ca lomaharṣe ca kaṇṭakaḥ ity amaraḥ ||