Premabase · Śrīmad Bhāgavatam · Canto 1 · Chapter 15
Show
SanskritHindiEnglish
Script
IASTदेवनागरीবাংলা
Commentary
ŚrīdharaJīvaViśvanāthaBaladeva
ŚB 1.15.29
← 1.15.281.15.30 →
vāsudevāṅghry-anudhyāna- paribṛṁhita-raṁhasā |
bhaktyā nirmathitāśeṣa- kaṣāya-dhiṣaṇo’rjunaḥ ||
Translation
— translation pending —
Commentary
Śrīdhara Svāmī
bhāvārtha-dīpikā
mati-vaimalya-phalam āha |
vāsudevāṅghry-anudhyāyena paribṛṁhitaṁ raṁho vego yasyās tayā bhaktyā nirmathitā unmūlitā aśeṣā kaṣāyāḥ kāmādayo yasyāḥ sā dhiṣaṇā buddhir yasya saḥ |
jñānaṁ punar adhyagamad [30] ity uttareṇānvayaḥ ||
Jīva Gosvāmī
krama-sandarbhaḥ
vāsudeveti pūrvasyaiva vivaraṇam idaṁ padya-dvayam |
tatra anudhyānaṁ pūrvoktā cintaiva |
kaṣāyaḥ pūrvoktaṁ malam eva ||
[prīti-sandarbhaḥ 52]
Viśvanātha Cakravartī
sārārtha-darśiṇī
nanu kāmādayaḥ kaṣāyā api mala-śabdenocyante, satyam |
arjunasya bhagavan-nitya-parikaratvena sākṣān narāvatāratvena ca tad-asambhava eva, mahendrāṁśatvena kaṣāyaḥ sambhavati cet, tad api naivety āha—vāsudeveti |
janmārabhyaivotpannayā bhaktyā prathamata eva nirmathitā unmūlitā aśeṣāḥ kaṣāyāḥ kāmādayo yasyāḥ sā dhiṣaṇā buddhir yasya, tathābhūta evārjunaḥ ||
Baladeva Vidyābhūṣaṇa
vaiṣṇavānandinī
nirmathito'śeṣaḥ kṛtsnaḥ kaṣāyo yasyās tādṛśī dhiṣaṇā dhīr yasya so'rjunaḥ iti tat-praviṣṭa-śakrāṁśaviṣayam etat, svayam arjunas tu yo'haṁ tam arjunaṁ viddhi yo'rjunaḥ so'ham eva ca iti mauṣalīya-bhagavad-vākyena tad-rūpa eveti na tatra tādṛśatvaṁ sambhāvyam ||
← 1.15.281.15.30 →