Premabase · Śrīmad Bhāgavatam · Canto 1 · Chapter 15
Show
SanskritHindiEnglish
Script
IASTदेवनागरीবাংলা
Commentary
ŚrīdharaJīvaViśvanāthaBaladeva
ŚB 1.15.9
← 1.15.81.15.10 →
yat-tejasā nṛpa-śiro-'ṅghrim ahan makhārtham
āryo’nujas tava gajāyuta-sattva-vīryaḥ |
tenāhṛtāḥ pramatha-nātha-makhāya bhūpā
yan-mocitās tad anayan balim adhvare te ||
Translation
— translation pending —
Commentary
Śrīdhara Svāmī
bhāvārtha-dīpikā
anantara-śloko vigītas tathāpi vyākhāyate |
nṛpa-śiraḥ-svaṅghir yasya taṁ jarāsandhaṁ tavānujo bhīmo makhārthamahan hatavān |
tan-nirjayaṁ vinā rājasūya-makhānupapatteḥ |
gajāyutasyeva sattvam utsāha-śaktir vīryaṁ balaṁ ca yasya saḥ |
taṁ hatvā pramatha-nātho mahā-bhairavas tasya makhāya ye rājānas tenāhṛtās te ca yad yasmān mocitās tat tasmād te’dhvare balim ānītavantaḥ ||
Jīva Gosvāmī
krama-sandarbhaḥ
na vyākhyātam.
Viśvanātha Cakravartī
sārārtha-darśiṇī
nṛpāṇāṁ tat-sajātīyānāṁ prākṛtānāṁ śiras tu aṅghrir yasya taṁ jarāsandham |
tavānujo bhīmaḥ |
makhārthaṁ tan-nirjayaṁ vinā rājasūya-makhānupapatteḥ gajāyutasyevasattvam utsāha-śaktiḥ vīryaṁ balaṁ ca yasya saḥ |
pramatha-nātho bhairavas tasya makhāya ye rājānaḥ tenāhṛtāḥ yady asmān mocitāḥ tasmāt te’dhvare balim ānītavantaḥ ||
Baladeva Vidyābhūṣaṇa
vaiṣṇavānandinī
nṛpāṇāṁ tat-sajātīyānāṁ śiraḥsv aṅghrir yasya, taṁ magadhendraṁ tavānujo mad-āryo bhīmo'han |
makhārthaṁ tad-dhananaṁ vinā makhāsiddheḥ |
kīdṛśaḥ? gajāyutasya iva sattva-vīrye utsāha-bale yasya saḥ |
tena māgadhendreṇa pramatha-nātha-makhāya ye bhūpā āhṛtāḥ, te yan-mocitāḥ, tat te'dhvare balim anayan ||
← 1.15.81.15.10 →