Śrīmad Bhāgavatam 1.13.41

Show

SanskritHindiEnglish

Script

IASTदेवनागरीবাংলা

Commentary

ŚrīdharaJīvaViśvanāthaBaladeva

ŚB 1.13.41

nārada uvāca

mā kañcana śuco rājan yad īśvara-vaśaṁ jagat |
lokāḥ sapālā yasyeme vahanti balim īśituḥ |
sa saṁyunakti bhūtāni sa eva viyunakti ca ||

Translation

— translation pending —

Commentary

Śrīdhara Svāmī

bhāvārtha-dīpikā

ādāv eva yathā-vṛtta-kathane śokena mūrcchitaḥ pated iti prathamaṁ tāvac chokam upaśamayati |

kañcana mā śuco mā śoca |

na kevalaṁ tān eva |

yad yasmād īśvarādhīnaṁ jagat |

tad evāha—lokā iti |

saṁyunakti saṁyojayati |

viyunakti viyojayati ca ||

Jīva Gosvāmī

krama-sandarbhaḥ

mā kañcana ity-ādau hi pāratantrya-mātram uktam |

tataś cedaṁ vinā pravṛttau pāratantryam uktveti pāratantrya-viśeṣoktir na ghaṭate |

sa saṁyunakti ity ardhaṁ ca kvacin nāsti |

kintu vahanti balim īśitur iti sthāna-dvaye pāṭhenaiva prathama-lekhaka-bhramo’yaṁ kvacit sampradāye’nuvṛtta iti lakṣyate ||

Viśvanātha Cakravartī

sārārtha-darśiṇī

ādāv eva yathā-vṛtta-kathane śokena mūrcchitaḥ pated iti prathamaṁ tāvat śokam upaśamayati |

mā śucaḥ mā śoca |

tayor vicchedena sīdāmīti ced apratikāryam etat saṁyoga-viyogayor īśvarādhīnatvād ity āha—sa iti ||

Baladeva Vidyābhūṣaṇa

vaiṣṇavānandinī

ādau yathā vṛttārtha-kathane śoka-mūrcchito nṛpatir nipated ataḥ pūrvaṁ śokaṁ nivartayann āha—mā kañcana iti |

mā śucaḥ mā śoca |

tatra hetuḥ—yad iti ||