Śrīmad Bhāgavatam 1.12.18

Show

SanskritHindiEnglish

Script

IASTदेवनागरीবাংলা

Commentary

ŚrīdharaJīvaViśvanāthaBaladeva

ŚB 1.12.18

śrī-rājovāca

apy eṣa vaṁśyān rājarṣīn puṇya-ślokān mahātmanaḥ |
anuvartitā svid yaśasā sādhu-vādena sattamāḥ ||

Translation

— translation pending —

Commentary

Śrīdhara Svāmī

bhāvārtha-dīpikā

mahā-bhāgavato bhaviṣyatīty ukte hṛṣṭaḥ pṛcchati |

api svit kiṁ svit |

sādhu-vādena yaśasā satkīrtyā ca anuvartitā bhaviṣyatīti pūrvasyaivātaḥ param apy anuṣaṅgaḥ ||

Jīva Gosvāmī

krama-sandarbhaḥ

apy eṣa vaṁśyān ity atra “hṛṣṭa” iti ṭīkāyāṁ harṣeṇaiva punaḥ praśno’yam, na tv apūrtyeti bhāvaḥ |

vastutas tu tathātve’pi rāja-śreṣṭhatā-jñānārthaṁ punaḥ praśnaḥ ||

Viśvanātha Cakravartī

sārārtha-darśiṇī

mahā-bhāgavato bhaviṣyatīty ukte rājaiva sāntaś camatkāraṁ sa-gāmbhīryaṁ pṛcchati |

api svit praśne |

anu lakṣyīkṛtya vartitā |

teṣāṁ sadṛśo bhaviṣyati na vety arthaḥ ||

Baladeva Vidyābhūṣaṇa

vaiṣṇavānandinī

mahā-bhāgavato bhaviṣyatīti niśamyātihṛṣṭaḥ pṛcchati—api sambhāvanāyāṁ, tān anu lakṣīkṛtya vartitā, tādṛśo bhaviṣyati na vā ? ity arthaḥ |

svit praśne ||