Premabase · Śrīmad Bhāgavatam · Canto 1 · Chapter 10
Show
SanskritHindiEnglish
Script
IASTदेवनागरीবাংলা
Commentary
ŚrīdharaJīvaViśvanāthaBaladeva
ŚB 1.10.27
← 1.10.261.10.28 →
aho bata svar-yaśasas tiraskarī
kuśasthalī puṇya-yaśaskarī bhuvaḥ |
paśyanti nityaṁ yad anugraheṣitaṁ
smitāvalokaṁ sva-patiṁ sma yat-prajāḥ ||
Translation
— translation pending —
Commentary
Śrīdhara Svāmī
bhāvārtha-dīpikā
dvārakāṁ ślāghante |
aho bata ity āścaryam |
kiṁ tat ? kuśa-sthalī dvārakā |
svara utkṛṣṭa iti yad yaśas tasya tiras-karī paribhava-kartrī |
bhuvaś ca puṇya-yaśaḥ-kartrī bhavati |
yad yato yatratyāḥ sarvāḥ prajāḥ svānugraheṇeṣitaṁ preṣitam |
smita-pūrvako’valoko yasya tam |
yad vā, anugrahārtham iṣitam iṣṭam |
"anugrahoṣītam" iti pāṭhe svānugrahārtham ūṣitaṁ kṛta-nivāsam |
eka-padya-pāṭhe tv anugraheṇoṣitaṁ yat smitaṁ, tat-pūrvako’valoko yasya tam |
svasya ātmanaḥ patiṁ śrī-kṛṣṇaṁ, na tu pitrādivad deha-mātra-patiṁ nityaṁ paśyanti sma |
naitat svarge’stīty arthaḥ ||
kaivalya-dīpikā : aho iti |
aho bata aho āścaryam |
kuśasthalī dvārakā |
yac-chabdābhyāṁ saiva smita-yukta avaloko yasya tam |
sva-patiṁ kṛṣṇam |
sa eva hi svasya ātmanaḥ patiḥ |
anya-dehasya |
yadu-kulādīni dhanyāni, na tv atrānyasya kasyacit kulam etat paraṁ vā |
yad īdṛśena nāyaka-ratnālaṅkṛtam iti bhāvātiśayaḥ ||
[mu.pha. 11.13]
Jīva Gosvāmī
krama-sandarbhaḥ
sva-patiṁ paśyanti |
atra ca smitāvalokaṁ paśyantīty arthaḥ ||
Viśvanātha Cakravartī
sārārtha-darśiṇī
madhu-vanaṁ stutvā dvārakāṁ smarantya āhuḥ |
aho kuśa-sthalī dvārakā svar yaśasa iti loka-rītyaivoktiḥ, na tu siddhānta-rītyā svaṁ-śabdena vaikuṇṭhābhidhānaṁ vā |
yad yataḥ yat prajāḥ yatratyāḥ prajāḥ sva-patiṁ kṛṣṇam anugraheṇaiva īṣitaṁ proṣitaṁ sarva-sukha-dānārtham antaḥ-purād dhastināpurādi-sthalād vā prasthāpitam ity arthaḥ |
yad vā, anugraha eva īṣita iṣṭo yatra tam anugraha-mātra-prāpty-artham ity arthaḥ |
"anugrahoṣitam" iti pāṭhe svānugrahārtham uṣitaṁ kṛta-nivāsaḥ |
naitat svarge’stīty arthaḥ ||
Baladeva Vidyābhūṣaṇa
vaiṣṇavānandinī
evaṁ madhuvanaṁ saṁstūya dvārakāṁ stuvanti—aho sakhyaḥ, bata iti āścarye, kuśasthalī dvārakā |
svar-yaśasaḥ svargādi-satyānta-kīrtes tiraskarī nyak-kartrī tal-loka-patibhiḥ sva-sva-kārya-siddhaye tasyāḥ samāśrayaṇāt, bhuvaḥ puṇya-yaśaskarī, bhū-sthitāyāṁ tasyāṁ pāvitryaṅkarāneka-bhagavac-caritrāṇāṁ prākaṭyāt svargādi-lokānūnayantī bhuvam utkarṣayantītyavicintyaḥ tasyāḥ prabhāvaḥ |
atha tad-vāsinaḥ stauti—yad yato yatratyāḥ prajāḥ sva-patiṁ nityaṁ smitāvalokaṁ paśyanti |
anugraha eva īṣita iṣṭo yasya taṁ |
yat-prajānāṁ sarveśvaro hariḥ sadaivātiprasanna ity arthaḥ |
na caivaṁbhāvaḥ svargādāv astīti ||
← 1.10.261.10.28 →