kiṁ ca, yadaiva rathād bhūmāv avaplutaḥ, tadaiva kṣatajaiḥ rudhiraiḥ pariplutaḥ sāṅgrāmika-rudhira-nadyā bindu-vyāptaḥ |
nanu kavacasya vidyamānatvāt kathaṁ tathātvam ? tatrāha—mama śitair viśikhair hatas tasya saṁrambha-sukha-vardhanārthaṁ, tad api mayā hanyate smaiveti bhāvaḥ |
yato viśīrṇa-kavacaḥ plavanāt prāg evābhavad ity arthaḥ |
prasabhaṁ balāt vārayantam arjunam apy atikramya mad-vadhārtham “adya sva-hastenaiva bhīṣmaṁ vadhiṣyāmi” ity abhiprāyeṇety arthaḥ |
abhisasāra ity atrābhi-śabdenābhisarantaṁ nāyakam ālokitavatyā nāyikāyā iva tadānīṁ mama sukham apāram evābhūd iti dyotyate |
na anyeṣāṁ mukundo mukti-prado’pi mama tu gatis tathā-bhūtatvenaiva prāpyo bhavatv iti |
he kṛṣṇa ! tvām aham etad eva prārthaye iti bhāvaḥ ||