nanu iti matir upakalpitety uktā yā, sā kim-ākārā matiḥ ? tatrāha—tribhuvana- iti |

vijayasya arjunasya sakhyau mamānavadyā phalābhisandhāna-rahitā ratiḥ prema astu |

kīdṛśe ? tribhuvanasya ūrdhvādho-madhya-loka-stha-jana-samudāyasya kamanam abhilāṣo yatra tad vapur dadhāne |

raveḥ karair gaura-vare atigaurī-kṛte ambare yatra |

tad arjuna-rathopari-sthitasya kṛṣṇasya pītāmbara-dvayaṁ sūrya-kiraṇa-samparkād aticākacikyavattvena tadānīm atipītaṁ mayā dṛṣṭaṁ, tena pārtha-sārathitvenopalabdha-mahā-saundarye kṛṣṇe ratiḥ prārthanā-mayī matir mayā tasminn evopakalpiteti bhāvaḥ |

atra cāgrimeṣv api ślokeṣu sākṣād-vartiny api bhagavati prārthanāyāṁ yuṣmat-pada-prayogābhāvaḥ āsvādita-care ca sāṅgrāmika-vīra-rasāveśa-maye tan-mādhurye eva cittasyāsaktiṁ bodhayati ||