iti mamāyuḥ-samāptau matir bhagavati upakalpitā mat-prabhau mad-anta-kāle kṛpā-paravaśatayaiva mat-samīpam āgate kiñcid upāyanaṁ datum ucitaṁ |
tatra samprati mam āhantāspada-mamatāspadayor madhye samīcīnaṁ kim apy anyan nāstīti hetor eṣā matir evopāyanatvena kalpitā |
nanu upāyana-dāyino loke kiñcij jighṛkṣavo dṛśyante ? tatrāha—vitṛṣṇā niṣkāmā |
bhagavati ṣaḍ-aiśvarya-pūrṇe |
kiṁ nārāyaṇatvena prasiddhe ? na, sātvata-puṅgave yadu-kulottaṁsatvena prasiddhe |
nanu nārāyaṇasyaiva bhagavattvena mahatī prasiddhiś ca sārvakālikī tatrāha—vibhūmni iti |
vigato bhūmā yasmāt, tasmin yam apekṣyānyatra mahattvaṁ nāstīti nārāyaṇāsyāpy avatāriṇīty arthaḥ |
tad api svair yādava-pāṇḍavair eva saha sukhaṁ paramānandam |
upa ādhikyena prāpta iti svarūpa-lakṣaṇam uktam |
taṭastha-lakṣaṇam āha—prakṛtiṁ māyām īkṣaṇena mahat-tattvādy-utpādakatayā upeyuṣi |
yataḥ prakṛter bhava-pravāhaḥ sṛṣṭi-paramparā tena puruṣādayo’py asyaivāvatārā iti bhāvaḥ ||