asyānubhāva-jñāna-sad-bhāvavatām api bhavatāṁ sambandha-viśeṣa-maya-sarvācchādaka-mādhurya-jñānātmaka-prema-viśeṣeṇa vaśīkāritvaṁ tu tair api durlabham ity āha—yam iti trayeṇa |
sauhṛdāt tādṛśa-premṇa eva hetoḥ, yaṁ mātuleyaṁ manyase |
atha sārathiṁ sārathim apīty arthaḥ |
sa eva sākṣād bhagavān ity-ādi-pūrveṇānvayaḥ |
ṭīkāyāṁ mātuleyāḥ ity-ādikaṁ strībhyo ḍhak-siddhārtham itthaṁ vyākhyātam |
mātulasyāpatyaṁ mātulāyanir ity eva syāt, vṛddhād apatye phis |