Premabase · Śrīmad Bhāgavatam · Canto 1 · Chapter 9
Show
SanskritHindiEnglish
Script
IASTदेवनागरीবাংলা
Commentary
MadhvācāryaŚrīdharaJīvaViśvanāthaBaladeva
ŚB 1.9.16
← 1.9.151.9.17 →
na hy asya karhicid rājan pumān veda vidhitsitam |
yad-vijijñāsayā yuktā muhyanti kavayo’pi hi ||
Translation
— translation pending —
Commentary
Madhvācārya
bhāgavata-tātparyam
asaṅgaś cāvyayo’bhedyo’nigrāhyo’śoṣya eva ca | viddho’sṛg-añcito baddha iti viṣṇuḥ pradarśyate ||
asurān mohayan devaḥ krīḍayaiva sureṣv api | mānuṣān madhyayā dṛṣṭyā na mukteṣu kathañcana ||
Śrīdhara Svāmī
bhāvārtha-dīpikā
nanu kṛṣṇaṁ kathaṁ kālo’tikramet ? ity apekṣāyām āha—na hy asya śrī-kṛṣṇasyety aṅgulyā nirdiśati |
vidhitsitaṁ kartum iṣṭaṁ yat |
yasya vidhitsitaṁ tasya jijñāsayā ||
Jīva Gosvāmī
krama-sandarbhaḥ
na hīti |
atra teṣām ārti-dvāreṇa svasminn āveśārthaṁ tat-khaṇḍana-janita-harṣa-dvāreṇa ca svasmin prema-vardhanārthaṁ tathā vidhitsitam iti gūḍho’bhiprāyaḥ ||
Viśvanātha Cakravartī
sārārtha-darśiṇī
tarhy atra kiṁ nirdhārayāmi ? sāmānyatas tāvad ayaṁ siddhāntaḥ sarva-vādi-sammato yat kṛṣṇasya cikīrṣitam anyathā-kartuṁ na ko’pi samarthaḥ |
tac cikīrṣitaṁ kim iti adyāpi ko’pi na vetti ? ity āha—na hy asya iti |
karhicid api kāle “ko’pi pumān brahma-bhavādiḥ ko’pi na veda, ahaṁ ko varākaḥ ?” iti bhāvaḥ |
nanu ko’pi mā jānātu, jijñāsā tu avaśyam eva jāyate |
tatrāsmāsu duḥkha-dānam eva kiṁ cikīrṣitam ? sukha-dānam eva vā ? ubhaya-dānam eva vā ? tatrādyaṁ na, bhakta-vātsalya-guṇasya lopānaucityāt |
dvitīyam api na, adṛṣṭatvād eva |
tṛtīyam api na, tat-sauhārda-lopāpatteḥ |
tarhi jijñāsām api naiva kartum uciteti vinirṇayann āha—yad-vijijñāsayā iti |
yuktā vivekino’pi kavayaḥ sarva-śāstra-jñā api moham eva prāpnuvanti siddhāntālābhād iti bhāvaḥ |
atra bhīṣmasya mahā-vijñasyoktau kavaya iti muhyanti iti padābhyāṁ yudhiṣṭhirādayo’pi bhagavad-bhaktāḥ prārabdhaṁ bhuñjate iti mataṁ parāstam ||
Baladeva Vidyābhūṣaṇa
vaiṣṇavānandinī
atha sva-matam āha—na hy asya iti |
asya kṛṣṇasya vidhitsitaṁ cikīrṣitaṁ karhicid api kāle pumān brahmādir api na veda, kim idaṁ vidhitsatīti na jānāti |
nanu na vettu ko'pi, jijñāsā tu jāyate? tatrāha—yad iti |
yuktā yoginaḥ kavayo vidvāṁso'pi |
etad uktaṁ bhavati—na khalu bhavatāṁ kaṣṭaṁ prārabdha-racitaṁ śakyaṁ vaktuṁ kṛṣṇaikāntiṣu tad-vallabhatvāt, tasya pāpāṁśa-miśratvena tadvati yudhiṣṭhire dharmatva-virodhāt |
na ca kāla-racitaṁ tat, kṛṣṇa-nātheṣu bhavatsu tad-vallabhatvāt, jñaḥ kāla-kālo guṇī sarva-vid yaḥ iti mantra-varṇāt kāla-kṛtam ity atra kāla-śakti-matā kṛṣṇenety arthāt |
sva-kāla-śaktyā iti vakṣyamāṇāt, tasmāt kṛṣṇādhīnaṁ bhavatāṁ kaṣṭaṁ, tvad avagamī na vetti bhavad-uttha-śubhāśubhayor guṇa-viguṇānvayaṁs tarhi deha-bhṛtāṁ ca giraḥ iti śruti-stotre bhavad-utthety upādānāt |
na ca tad-vijijñāsāpi yuktā, tayā kavīnām api mohāt, tathā hi—tasya bhavatsu duḥkha-dānaṁ sukha-dānam ubhaya-dānaṁ vā vidhitsitam? nādyaḥ, bhakta-vatsalya-hānāt, na madhyaḥ, adarśanāt, nāntyaḥ, sauhārda-vilopāt ||
← 1.9.151.9.17 →