nanu tarhi katham asmākaṁ kleśaḥ ? tatra tat-kāraṇaṁ prācīnārvācīnaṁ kim api pāpam apaśyan vaktum asamartha eva lokokti-rītyaivāha—sarvam iti |

nanu, kālo hi prārabdha-sukha-duḥkha-bhogayor evādhikaraṇam eveti sahakāritvād upacāreṇaiva kāla-kṛtaṁ manye iti brūṣe |

prārabdha-pāpa-kṛtam iti spaṣṭaṁ kathaṁ na vadasi ? ity ata āha—bhavatāṁ ca iti |

yudhiṣṭhiro hi sākṣād-dharmāvatāra iti prasiddha eva |

dharmasyāpi prārabdhaṁ pāpam astīti cen mantavyaṁ, tarhi kathaṁ dharmasya dharmatvam ? ato’tiprabalo’tidurnivāro dustarkaḥ kāla eva kāraṇam ity āha—sa-pāla iti ||