Premabase · Śrīmad Bhāgavatam · Canto 1 · Chapter 8
Show
SanskritHindiEnglish
Script
IASTदेवनागरीবাংলা
Commentary
ŚrīdharaJīvaViśvanāthaBaladeva
ŚB 1.8.43
← 1.8.421.8.44 →
śrī-kṛṣṇa kṛṣṇa-sakha vṛṣṇy-ṛṣabhāvani-dhrug-
rājanya-vaṁśa-dahanānapavarga-vīrya |
govinda go-dvija-surārti-harāvatāra
yogeśvarākhila-guro bhagavan namas te ||
Translation
— translation pending —
Commentary
Śrīdhara Svāmī
bhāvārtha-dīpikā
evam abhyarthya punaḥ praṇamati |
he śrī-kṛṣṇa, te namaḥ, upakārān anusmarantī bahudhā saṁbodhayati |
kṛṣṇa-sakhārjunasya sakhe |
vṛṣṇīnām ṛṣabha śreṣṭha |
avanyai bhūmyai druhyanti ye rājanyās teṣāṁ vaṁśasya dahana |
evam apy anapavarga-vīryākṣīṇa-prabhāva |
govinda prāpta-kāma-dhenv-aiśvarya |
go-dvija-surāṇām ārti-hāro’vatāro yasyeti ||
Jīva Gosvāmī
krama-sandarbhaḥ
govindeti |
nitya-prāpta-parama-golokādhipatyety arthaḥ |
yad vā, atha viśveśa [bhā.pu. 1.8.41] ity-ādi-padya-trayasyaivaṁ yojanā, tat-priya-varge sva-sambandha-hetukāṁ prītiṁ niṣidhya śrī-bhagavaty eva tām abhyarthya punas tat-priya-varge tad-ādhāratvenaiva prītim aṅgīkaroti—atheti tribhiḥ |
tatra niṣedhaḥ prathamena, abhyarthanā dvitīyena, aṅgīkāras tṛtīyena |
atra śrī-kṛṣṇa-sakhety-ādi-sambodhanais tat-prīty-ādhāratvenārjunādiṣv api prītir aṅgīkṛtā ||
43||
[prīti-sandarbhaḥ 114]
Viśvanātha Cakravartī
sārārtha-darśiṇī
stavānte sarva-sukhadatvena smarantī praṇamati |
kṛṣṇasya arjunasya sakhā |
avanyai druhyanti ye rājanyāḥ, teṣāṁ vaṁśā eva vaṁśās teṣāṁ dahana ! anapavarga-vīrya ! he akṣīṇa-parākrama |
he govinda ! prāpta-kāma-dhenv-aiśvarya ||
Baladeva Vidyābhūṣaṇa
vaiṣṇavānandinī
evam akhaṇḍāṁ ratiṁ prārthya sarvānanda-karatvena smarantī praṇamati—he srī-kṛṣṇa ! he kṛṣṇa-sakha ! phālguna-mitra ! avani-druhāṁ rājānyānāṁ vaṁśā eva vaṁśās teṣāṁ dahana ! anapavarga-vīrya ! akṣīṇa-parākrama! govinda ! he labdhānanta-kāma-dhenv-aiśvarya nanda-prasūno ! bhagavan te tubhyaṁ namaḥ ||
← 1.8.421.8.44 →