tarhi kiṁ brahma-jñāne spṛhāvatī bhavasi ? vṛṣṇiṣu sneha-cchede mayy api sneha-cchedāt tatra nety āha—tvayīti |

tvayi matiḥ ratiṁ prītim utkarṣeṇa vahatāt anavacchinnatayā dadhātu |

kiṁ tv ananya-viṣayā tvad-bhaktās tvad-abhinnā eva teṣu prītiṁ vinā tvayy api prītir na siddhyet, tvaṁ prasīdasīty api nety ahaṁ jānāmy eva |

atas tvattas tvad-bhaktebhyaś cānyatra mamatva-śūnyā |

tad api pāṇḍaveṣu yādaveṣu tvad-bhakteṣv api yat snehasya chedaṁ prārthaye tat tvad-avatārāt pūrvata eva deha-sambandhena yo vyavahāra-mayaḥ snehaḥ pravṛttas tasyaiva, na tu tvat-priyatva-nibandhanasya |

ata eva bandhakatvena sa mayā pāśa-rūpakeṇa prayukta iti bhāvaḥ |

ata eva gaṅgā yathā udanvaty akhila-nada-nadīnām āśraye oghaṁ pūraṁ vahati, tathā matir api sarva-bhaktāśrayaṇīye tvayi ratim |

yathā ca gaṅgā pratibandhaṁ na gaṇayati evaṁ matir api vighnān na gaṇayatv iti bhāvaḥ ||