kiṁ ca, tad api tava sāmya-vaiṣamya-kartṛtvākartṛtva-janmavattvājatvādiṣu siddhāntān nirvidya |

līlaivāsvādanīyety āha—janmeti dvābhyām |

ajasya janma akartuḥ karma tatrāpi tiryag-ādiṣu tac ca tac ca tava sarvotkṛṣṭasyeśvarasyātyanta-viḍambanam |

tat-taj-jātīyārthenātmano nyūnatvāṅgīkārāt |

tathā hi vārāhe janmani ghrāṇena pṛthvyāḥ padavīṁ vijighrann ity-ādinā sarvajñatve’pīśvaratve’pi vāstava-śūkara evābhūr yam avalokya jahāsa cāho vana-gocaro mṛta ity eva na tattva-jñās tvāṁ karmādhīnaṁ jīvam eva manyanta iti bhāvaḥ |

atrājatvākartṛtvayor eva satyatve janma-karma-lakṣaṇayor līlayor mithyātvam |

tathātve ca tasyā śukadevādy-ātmārāma-gaṇa-cittākarṣaṇasyāsaṅgatiḥ |

janma karma ca me divyam evaṁ yo vetti tattvataḥ [bhā.pu. 4.9] iti bhagavad-ukteś ca janma-karmaṇoḥ satyatve ajatvākartṛtvayor asaṅgatir iti |

tasmād acintyānanta-śaktimato bhagavataḥ ko veda tattvam iti ||