Premabase · Śrīmad Bhāgavatam · Canto 1 · Chapter 8
Show
SanskritHindiEnglish
Script
IASTदेवनागरीবাংলা
Commentary
ŚrīdharaJīvaViśvanāthaBaladeva
ŚB 1.8.29
← 1.8.281.8.30 →
na veda kaścid bhagavaṁś cikīrṣitaṁ
tavehamānasya nṛṇāṁ viḍambanam |
na yasya kaścid dayito’sti karhicid
dveṣyaś ca yasmin viṣamā matir nṛṇām ||
Translation
— translation pending —
Commentary
Śrīdhara Svāmī
bhāvārtha-dīpikā
nanu nigrahānugraha-rūpaṁ mayi prasiddhaṁ vaiṣamyam ata āha—na vedeti |
nṛṇāṁ viḍambanam anukaraṇam īhamānasya kurvataḥ |
yasmiṁs tvayi viṣamā matir anugraha-nigraha-rūpā bhavati ||
Jīva Gosvāmī
krama-sandarbhaḥ
na vyākhyātam.
Viśvanātha Cakravartī
sārārtha-darśiṇī
nanu tatra kalahe tattva-niścāyakaḥ ko bhavet ? tatra na ko’pīty āha—na vedeti dvābhyām |
nṛṇāṁ śāstra-vivādināṁ teṣāṁ viḍambanaṁ jñāna-vaiphalyam īhamānasya icchataḥ |
yad vā, rāma-kṛṣṇādy-avatāre svīyena naratvena nṛṇāṁ nara-mātrāṇām eva viḍambanam īhamānasya tādṛśa-saundarya-sādguṇe caritrādy-adarśanād anyena vā viḍambitā evaṁ bhavantīti bhāvaḥ |
nṛṇāṁ nara-mātrāṇāṁ viṣamā matir iti yathā sūryasya sūrya-kānta-śilāyāṁ sva-tulya-dharmatva-pradānenāsaktau andheṣu audāsīnye cakravākeṣūpakāritve ghūka-taskarāndhakārādiṣv apakāritve lakṣyamāṇe’pi na tasya vaiṣamyam, kintu tatra tatra vastu-sādguṇya-vaiguṇyād eva kāraṇam iti bodhyam ||
Baladeva Vidyābhūṣaṇa
vaiṣṇavānandinī
nanu teṣu kalaheṣu madhye kaścinmāṁ vetti? nety āha—he bhagavaṁs tava cikīrṣitaṁ kaścid api na veda |
kīdṛśasya? atimānuṣa-daivatena nṛ-caritena nṛṇāṁ viḍambanaṁ tiraskāramīhamānasya kurvāṇasya yasya tava kaścic-chiṣṭo dayitaḥ kaścid aśiṣṭaś ca dveṣyo nāsti, tad anugraha-nigrahayos tat-tat-karma-nimittakatvāt |
āha caivaṁ sūtrakāraḥ vaiṣamya-nairghṛṇye na sāpekṣatvāt, tathā hi darśayati , tathāpi nṛṇāṁ matir yasmin viṣamā, ataḥ kaścin na vedeti ||
← 1.8.281.8.30 →