Śrīmad Bhāgavatam 1.8.28

Show

SanskritHindiEnglish

Script

IASTदेवनागरीবাংলা

Commentary

ŚrīdharaJīvaViśvanāthaBaladeva

ŚB 1.8.28

manye tvāṁ kālam īśānam anādi-nidhanaṁ vibhum |
samaṁ carantaṁ sarvatra bhūtānāṁ yan mithaḥ kaliḥ ||

Translation

— translation pending —

Commentary

Śrīdhara Svāmī

bhāvārtha-dīpikā

nanu devakī-putraṁ māṁ katham evaṁ stauṣi tatrāha |

manye tvāṁ kālaṁ natu devakī-putram |

tatra hetavaḥ—īśānaṁ niyantāram |

anādi-nidhanam ādy-anta-śūnyam |

vibhuṁ prabhum |

samaṁ yathā bhavati tathā sarvatra carantam |

nanu pārtha-sārartheḥ kathaṁ mama sāmyaṁ tatrāha |

yad yatas tvatto nimitta-bhūtād bhūtānām eva mithaḥ kaliḥ kalaho bhavati natu svatas tvayi vaiṣamyam ||

Jīva Gosvāmī

krama-sandarbhaḥ

sa tu tava susvabhāvas tarkāgocara evety āha—manya iti caturbhiḥ |

kālam antaryāminam |

īśānaṁ bahiś ca sarva-niyantāram |

yad yatra yeṣu bhāveṣu bhūtānāṁ mithaḥ kalir bhavati |

teṣu samaṁ carantam |

atra prathame samatvam, dvitīye samatve’pi bhakta-tad-dveṣiṇor anugraha-nigraha-rūpācaritatvam |

tṛtīye tad-artha-tal-līlāvatāre parama āveśaḥ |

caturthe tu tatrāpi parama iti ||

Viśvanātha Cakravartī

sārārtha-darśiṇī

bhaktāparādhiṣu saṁhārakatvam āha—kālam iti |

na tv āsakty audāsīnyopakāraktvāpakārakatvair api tvayi vaiṣamyam ity āha—samam iti |

yad yatra mithaḥ kaliḥ kalaha īśvaro duḥkhadaḥ sukhadaḥ samo viṣamo nirghṛṇaḥ saghṛṇa ity-ādi ||

Baladeva Vidyābhūṣaṇa

vaiṣṇavānandinī

kālaṁ śiṣṭa-vidveṣi-saṁhārakam |

īśānaṁ tat-saṁhāre samartham |

anādi-nidhanaṁ vibhuṁ tād-rūpeṇa sarva-deśa-kālasthitam |

sarvatra śiṣṭeṣu duṣṭeṣu ca samaṁ yathā syāt-tathā carantaṁ vartamānam ity arthaḥ |

yady asmiṁs tvayi bhūtānāṁ mithaḥ kaliḥ—baddho mukto veśvaraḥ, ādye'sāmarthamantye pravṛtty abhāva iti vyarthas tat svīkāraḥ |

atha samo viṣamo veśvaraḥ nādyaḥ, anugraha-nigrahayor darśanāt, nāntyaḥ, sāmya-vākyād itevyaṁ kalahaḥ ||