Premabase · Śrīmad Bhāgavatam · Canto 1 · Chapter 8
Show
SanskritHindiEnglish
Script
IASTदेवनागरीবাংলা
Commentary
ŚrīdharaJīvaViśvanāthaBaladeva
ŚB 1.8.27
← 1.8.261.8.28 →
namo’kiñcana-vittāya nivṛtta-guṇa-vṛttaye |
ātmārāmāya śāntāya kaivalya-pataye namaḥ ||
Translation
— translation pending —
Commentary
Śrīdhara Svāmī
bhāvārtha-dīpikā
prastuta-manoratha-pūraṇāya punaḥ praṇamati |
akiñcanā bhaktā eva vittaṁ sarvasvaṁ yasya tasmai |
tataḥ kim ? nivṛttā guṇa-vṛttayo dharmārtha-kāma-viṣayā yasmāt tasmai |
tat kutaḥ ? ātmārāmāya |
tat kutaḥ ? śāntāya rāgādi-rahitāya |
kiṁ ca, kaivalya-pataye kaivalyaṁ dātuṁ samarthāya ||
Jīva Gosvāmī
krama-sandarbhaḥ
nanv akiñcana-vittatvena kiyan māhātmyaṁ jātam ? tatrāha—nivṛtteti |
guṇa-vṛtti-rahitasya tava yad-bhakta-vittatvam, tat parama-mahad eveti bhāvaḥ |
tad dhi bhaktānāṁ nirguṇatvaṁ sarva-guṇa-mayād utkṛṣṭatvaṁ ca vyanakti—ātmārāmāyety anena |
tato’py ādhikyam |
ātmārāmasyāpi tad-vittatvāt |
evaṁ śāntāyety ādi ||
Viśvanātha Cakravartī
sārārtha-darśiṇī
akiñcanā na vidyate kiñcin-mātraṁ prākṛtaṁ vastu, api tu tval-lakṣaṇaṁ pūrṇa-cid-ānanda-svarūpaṁ vastv asti yeṣāṁ, te ekānta-bhaktā eva vittāni dhanānīty ati-premāspadāni sarvataḥ saṅgopanīyāś ca yasya tasmai teṣāṁ vittāyeti vā |
nanv akiñcanā daridrā ucyante ? satyam |
bhagavad-bhaktānāṁ māyā-guṇa-vṛtty-utthāḥ sampado na bhavantīty āha—nivṛttā guṇa-vṛttayo viṣaya-bhogā yasmāt tasmai |
akiñcana-bhakteṣv evāsaktim uktvā, anyeṣu tv audāsīnyam āha—ātmārāmāyeti |
bhaktānām aparādhe saty api na tvaṁ kupyasīty āha—śāntāya sva-bhakte svanugrahāya |
mumukṣu-bhakteṣūpakārakatvam āha—kaivalyeti ||
Baladeva Vidyābhūṣaṇa
vaiṣṇavānandinī
akiñcana-preṣṭhatvena punaḥ praṇamati—kṛṣṇādanyat kiñcana vittaṁ yeṣāṁ nāsti, te'kiñcanās teṣāṁ vittāya, te vā vittaṁ yasya tasmai, kuta evaṁ? tatrāha—nivṛtta guṇa-vṛttayo yasmāt-tasmai |
akiñcaneṣvāsaktim abhidhāya tebhyo'nyatraudāsīnyam āha—ātmā-rāmāyeti |
śāntāya sāparādhe'pi bhakte kopaśūnyāya |
kaivalasya mokṣasya patye svāmine tat-pradāyety arthaḥ ||
← 1.8.261.8.28 →