Śrīmad Bhāgavatam 1.8.21

Show

SanskritHindiEnglish

Script

IASTदेवनागरीবাংলা

Commentary

ŚrīdharaJīvaViśvanāthaBaladeva

ŚB 1.8.21

kṛṣṇāya vāsudevāya devakī-nandanāya ca |
nanda-gopa-kumārāya govindāya namo namaḥ ||

Translation

— translation pending —

Commentary

Śrīdhara Svāmī

bhāvārtha-dīpikā

jñāna-bhakti-yoga-śakyatvam uktvā punaḥ kevalaṁ namaskaroti—kṛṣṇāyeti dvābhyām ||

Jīva Gosvāmī

krama-sandarbhaḥ

tad evambhūto’pi tvam aho ! asmākam itthaṁ sukhadas tāpahārī ca saṁvṛtto’sīti tat tat smṛtvā namaskaroti—kṛṣṇāyeti ||

Viśvanātha Cakravartī

sārārtha-darśiṇī

ataḥ sarvāvatāreṣu madhye tvam evātiśreṣṭha ityāha kṛṣṇāyeti |

tatrāpi yāṁs tvaṁ svīkaroṣi teṣv api premavatsu dhanyeṣu madhye mad-bhrātā atidhanyo yas te pitety āha—vāsudevāyeti |

tato’pi adhika-premavatī devakī dhanyā yā te mātety āha—devakīṁ nandayasi tadīya-garbhe sthityā tāṁ sarvato’pi samṛddhimatīṁ karoṣīty arthaḥ |

tato’py adhika-premavān nando dhanya ity āha—nanda-gopasya kumārāya kaumāra-līlā-mādhuryaṁ sa evāsvādayāmāseti bhāvaḥ |

tato’pi premavatī dhanyā yaśodety agrima-śloke vakṣyate |

kaumāra-līlāto’pi vraja-sthasya tava kaiśora-līlā-mādhuryam adhikam ity āha—govindāyeti |

kaiśorārambhe evābhiṣekānantaraṁ govinda-nāma-khyāteḥ, tadaiva gāḥ sarveṣāṁ sarvendriyāṇi vindase ākṛṣya prāpnoṣīty arthaḥ |

asādhāraṇyena tad-āsvādaka-janās tu rahasyatvena svīya-rasāsvādanānaucityena ca noṭṭaṅkitāḥ ||

Baladeva Vidyābhūṣaṇa

vaiṣṇavānandinī

asmat-to'pi vasudevādayo'tidhanyā ity āha—kṛṣṇāyeti |

vāsudevāya vasudevasya mad-bhrātaḥ putrāya |

devakīṁ garbha-sthity ānandayasīti tat-sambandhad eva vayaṁ ca dhanyā iti bhāvaḥ |

tābhyām api nandāyo'tidhanyā ity āha—nandanāmā gopo vraja-bhūpatiḥ, ayājayad-gosavena gopa-rājan ity-ādi-vakṣyamāṇāt, tasya kumārāyātmajāya |

govindāya gavendratayendreṇābhiṣiktāya |

pāyān na indro gavām iti vakṣyati |

gavendratvaṁ khalu mahaiśvaryam—

gobhyo yajñaḥ pravartante gobhyo devāḥ samutthitāḥ | gobhir vedāḥ samudgīrṇāḥ saṣaḍaṅga-padakramāḥ ||

yathā ca kaumārādi-līlā-sudhānāṁ nandādibhir evānubhavāt-teṣām atidhanyatvam ||