yasmād antar uttarā-garbha-stho bālakaṁ ca rakṣitavān asi bahiś cāsmāṁś ca rakṣan samīpe ca tiṣṭhasīti kiṁ tvaṁ paricchinno’si vyāpako veti tvām ahaṁ jñātuṁ na śaknomīty āha—māyaiva javanikā tiraskariṇī tayā ācchannam |

nanu, kiṁ māyā mām āvṛṇoti ? tatrāha—ajñā meghācchannaṁ sūryam ahaṁ na paśyāmītivan māyayā mad-dṛṣṭyācchādanāt tvām apy ācchannaṁ paśyāmīty arthaḥ |

yato’dhokṣajam adhaḥ sthitam akṣajaṁ jñānaṁ yasyeti aindriyakaṁ jñānaṁ yasyādhaḥ sthitam |

evaṁ na spraṣṭuṁ prabhavatīty aham aindriyaka-jñānavatī ajñaiva, na ca mādṛśa-nikṛṣṭa-jananājñeyatve tava kāpi kṣatir ity āha—avyayam iti |

nanu, māṁsākṣāt paśyasi stauṣi prakṛteḥ paratvena jānāsi tad apy ajñāsīty ātmānaṁ kim iti nindasi ? ity ata āha—na lakṣyase iti |

nāṭyadharaḥ gīyamāna-gīta-padārthābhinaya-rasānurūpa-nṛtya-tālādi-viśiṣṭo naṭo mūḍha-dṛśā saṅgīta-śāstrānabhijñena naṭo’yaṁ naṭatīty evaṁ dṛṣṭo’pi yathā na lakṣyate na jñāta-tattvo bhavati tathaiva tvaṁ mayā dṛṣṭo’pi na lakṣyase |

iti tathety asya pūrveṇaivānvayaḥ |

pāṇḍavān sva-bhāktān pālayann api sarvāntaryāmy api muhur apy aśvatthāmādi pāṇḍava-vadhārtham astraṁ grāhayasi svayaṁ nyasta-śastro’py astraṁ gṛhṇāsi śiṣṭa-pālana-pravṛtto’pi bhīṣmādīn saṁhārayasi daupadī-subhadrayor atisnihyann api tat-putrān ghātayasīty evam ādikā tava līlā kiṁ-tattvety ahaṁ na jānāmīti bhāvaḥ ||