tam evārthaṁ śrī-śukasyāpy anubhavena saṁvādayati—harer guṇeti |
śrī-vyāsadevād yat-kiñcic-chrutena guṇena pūrvam ākṣiptā matir yasya saḥ |
paścād adhyagāt mahad-vistīrṇam api |
tataś ca tat-saṅkathā-sauhārdena nityaṁ viṣṇu-janāḥ priyā yasya tathābhūto vā, teṣāṁ priyo vā svayam abhavad ity arthaḥ |
ayaṁ bhāvaḥ—brahma-vaivartānusāreṇa pūrvaṁ tāvad ayaṁ garbham ārabhya śrī-kṛṣṇasya svairitayā māyā-nivārakatvaṁ jñātavān |
tatra sva-niyojanayā śrī-vyeda-vyāsenānītasya tasyāntar darśanāt tan-nivāraṇe sati kṛtārthaṁ-manyatayā svayam ekāntam eva gatavān |
tatra śrī-vyāsadevas tu taṁ vaśīkartuṁ tad-ananya-sādhanaṁ śrī-bhāgavatam eva jñātvā, tad-guṇātiśaya-prakāśamayāṁs tadīya-padya-viśeṣān kathañcic chrāvayitvā tena tam ākṣipta-matiṁ kṛtvā, tad eva pūrṇaṁ tam adhyāpayāmāseti śrī-bhāgavata-mahimātiśayaḥ proktaḥ ||