Premabase · Śrīmad Bhāgavatam · Canto 1 · Chapter 7
Show
SanskritHindiEnglish
Script
IASTदेवनागरीবাংলা
Commentary
ŚrīdharaJīvaViśvanāthaBaladeva
ŚB 1.7.7
← 1.7.61.7.8 →
yasyāṁ vai śrūyamāṇāyāṁ kṛṣṇe parama-pūruṣe |
bhaktir utpadyate puṁsaḥ śoka-moha-bhayāpahā ||7 ||
Translation
— translation pending —
Commentary
Śrīdhara Svāmī
bhāvārtha-dīpikā
saṁhitāyā anarthopaśamakatvaṁ darśyati—yasyām iti |
yasyāṁ vai śrūyamāṇāyām eva, kiṁ punaḥ śrutāyām ity arthaḥ ||
Jīva Gosvāmī
krama-sandarbhaḥ
atha prayojanaṁ ca spaṣṭayituṁ pūrvoktasya pūrṇa-puruṣasya ca śrī-kṛṣṇa-svarūpatvaṁ vyañjayituṁ grantha-phala-nirdeśa-dvārā tatra tad-anubhavāntaraṁ pratipādayann āha—yasyām iti |
bhaktiḥ premā, śravaṇa-rūpayā sādhana-bhaktyā sādhyatvāt |
utpadyate āvirbhavati |
tasyānuṣaṅgikaṁ guṇam āha—śoketi |
atraiṣāṁ saṁskāro’pi naśyatīti bhāvaḥ |
prītir na yāvan mayi vāsudeve na mucyate deha-yogena tāvat [bhā.pu. 5.5.6] iti śrī-ṛṣabha-deva-vākyāt |
parama-puruṣe pūrvokta-pūrṇa-puruṣe |
kim ākāraḥ ? ity apekṣāyām āha—kṛṣṇe |
kṛṣṇas tu bhagavān svayam [bhā.pu. 1.3.28] ity-ādi-śāstra-sahasra-bhāvitāntaḥ-karaṇānāṁ paramparayā tat-prasiddhi-madhya-pātināṁ cāsāṅkhya-lokānāṁ tan-nāma-śravaṇa-mātreṇa yaḥ prathama-pratīti-viṣayaḥ syāt, tathā tan-nāmnaḥ prathamākṣara-mātraṁ mantrāya kalpamānaṁ yasyābhimukhyāya syāt tad-ākāra ity arthaḥ |
āhuś ca nāma-kaumudī-kārāḥ—kṛṣṇa-śabdasya tamāla-śyāmala-tviṣi yaśodāyāḥ stanandhaye para-brahmaṇi rūḍhiḥ iti ||
[tattva-sandarbha 47]
Viśvanātha Cakravartī
sārārtha-darśiṇī
saṁhitāyāṁ prema-sādhanatvam āha |
yasyāṁ śrūyamānāyām eva kiṁ punaḥ śrutāyāṁ, kintarāṁ kīrtyamānāyāṁ, kintamāṁ kīrtitāyām |
bhaktiḥ premā īśvaraḥ sadyo hṛdy avarudhyate’tra kṛtibhir [bhā.pu. 1.1.2] ity-ukter īśvarāvarodhasya phalasya premṇa eva liṅgatvād bhaktānām ananusaṁhita-phalaṁ saṁsāra-nivṛttiḥ, sā ca bhaktānām eva bhavatīty āha—śokety ādi ||
Baladeva Vidyābhūṣaṇa
vaiṣṇavānandinī
saṁhitāyā viṣayaṁ phalañcāha—yasyām iti śruyāmāṇāyāṁ kiṁ punaḥ śrūtāyāṁ kīrtitāyāṁ vā, bhaktiḥ premā, ananusaṁhitaṁ phalam āha—śoketi |
tadā tan-mūlam api naśyatīty arthaḥ |
kṛṣṇo'sya viṣayas tasmin prema tu phalaṁ mokṣas tvāntara-vyāpāratayā bhaved eva ||
← 1.7.61.7.8 →