Premabase · Śrīmad Bhāgavatam · Canto 1 · Chapter 6
Show
SanskritHindiEnglish
Script
IASTदेवनागरीবাংলা
Commentary
ŚrīdharaJīvaViśvanāthaBaladeva
ŚB 1.6.28
← 1.6.271.6.29 →
evaṁ kṛṣṇa-mater brahman nāsaktasyāmalātmanaḥ |
kālaḥ prādurabhūt kāle taḍit saudāmanī yathā ||
Translation
— translation pending —
Commentary
Śrīdhara Svāmī
bhāvārtha-dīpikā
kāle svāvasare kālo mṛtyuḥ prādurabhūd āvirbabhūva |
akasmāt prādur bhāve dṛṣṭāntaḥ—taḍid iveti |
saudāmanīti viśeṣaṇaṁ sphuṭatva-pradarśanārtham |
tathā hi sudāmā mālā, tatra bhavā saudamanī mālākārety arthaḥ |
yad vā, sudāmā-nāmā kaścit sphaṭika-parvataḥ |
tataḥ tenaika-dig iti sūtreṇāṇ |
sphaṭikādi-maya-parvata-prānte bhavā hi vidyud ati-sphuṭā bhavati, tadvad ity arthaḥ |
yad vā, taḍid ity antike ity arthaḥ |
taḍid ity antika-vadhayor iti nairukta-smaraṇāt ||
Jīva Gosvāmī
krama-sandarbhaḥ
kālas tat-kṛpāvasaraḥ prādurabhūt |
kāle prārabdha-kṣaye |
yathāvagraha-kṣaye taḍitsaudāmanīti—go-balīvarda-nyāyena cānadhikārtham idam ||
Viśvanātha Cakravartī
sārārtha-darśiṇī
kāle mama sthūla-deha-bhaṅga-samaye kālaḥ prādurabhūt, yaṁ kālaṁ pratīkṣamāṇaḥ pūrvaṁ cirād abhūvaṁ sa ity arthaḥ |
rājño gamana-samaye tasya gamana-samayam itivat |
buddhir hi bhagavati abhede’pi bhedaṁ janayatīty anunyāsaḥ kālayos tayor akasmād yugapad evādhārādheya-bhāvena prādurbhāve dṛṣṭāntaḥ |
taḍiti vidyuti saudāmanī yathā |
ekasyāṁ saudāminyāṁ tathaivānyā saudāminī kadācid yathā bhavati, tathaiva mama pāñcabhautika-deha-bhaṅga-kāle eva pārṣada-deha-prāpti-kāle’bhūd ity arthaḥ ||
Baladeva Vidyābhūṣaṇa
vaiṣṇavānandinī
kāle prākṛta-mad-deha-bhaṅga-samaye kālo mama taj-janatārpakaḥ prādur abhūt yaṁ cirāt pratīkṣamāṇo'ham abhūvaṁ so'bhyāgamadity arthaḥ |
kālaḥ sarvadāstīti |
vad ekasyaika-kālasya viśeṣād ādhārādheya-bhāvaḥ |
tathātve dṛṣṭāntaḥ—taḍ iti yathā saudāminīti ekasyāṁ vidyuti yathānyā bhavati tadvat, tāḍayatīti taḍid āghātakarī, sudāmā sphaṭika-giris tat-prānte bhavāt saudāmanī prakāśakarī |
tenaika dik iti sūtrādaṇ |
evaṁ pūrvaḥ kālaḥ prāṇa-haraḥ, parastu taj-janatārpaka iti bhāvaḥ ||
← 1.6.271.6.29 →