tad evaṁ bhakti-rahitānāṁ jñāna-karmādīnāṁ naiṣkarmyaṁ [bhā.pu. 1.5.12] ety ādinā nindayā sarvathā heyatvam uktvā, tyaktvā svadharmaṁ [bhā.pu. 1.5.17] ity-ādi śloka-trayyā paramopadeyāṁ śuddhāṁ nirguṇāṁ bhaktiṁ stutvā, ahaṁ purātīta-bhave [bhā.pu. 1.5.23-28] ity-ādi-śloka-ṣaṭkena tasyā eva bhakter āvirbhāva-prakāraṁ prema-paryantāṁ vṛddhiṁ coktvā, adhikāri-viśeṣe punar upādeyaṁ bhakti-miśraṁ jñānaṁ tato’dhikāṁ karma-miśrāṁ bhaktiṁ coktvā, idānīṁ brūyuḥ snigdhasya śiṣyasya guravo guhyam apy uta [bhā.pu. 1.1.8] ity ukteḥ śrī-gurubhyaḥ prāptaṁ sva-mantram api tam upadidikṣus tatra śraddhām utpādayann āha dvābhyāṁ—oṁ nama iti |

trayastriṁśad-akṣarātmako mantraś caturvyūhātmako bhagavān atra devatā saṅkarṣaṇādi, krama-viparyayeṇa nirdeśas tu śrī-kṛṣṇa-caturvyūhatvaṁ bodhayati tat-putra-pautratvena pradyumnāniruddhayos tan-nikaṭa-pāṭhāt |

yad vā, pradyumnāniruddha-saṅkarṣaṇānāṁ krameṇa sṛṣṭi-sthiti-saṁhāra-kāraṇatvāt tathoktiḥ |

namo dhīmahi namaskāraṁ dhyayema manasā namanaṁ kurvīmahīty arthaḥ ||

[atra prāyo yathāvat bhā. 6.16.18, 10.40.21, 11.5.29-mantrā draṣṭavyāh |

]