Premabase · Śrīmad Bhāgavatam · Canto 1 · Chapter 5
Show
SanskritHindiEnglish
Script
IASTदेवनागरीবাংলা
Commentary
ŚrīdharaJīvaViśvanāthaBaladeva
ŚB 1.5.36
← 1.5.351.5.37 →
kurvāṇā yatra karmāṇi bhagavac-chikṣayāsakṛt |
gṛṇanti guṇa-nāmāni kṛṣṇasyānusmaranti ca ||
Translation
— translation pending —
Commentary
Śrīdhara Svāmī
bhāvārtha-dīpikā
bhagavad-arpaṇena kriyamāṇaṁ karma bhakti-yogaṁ janayatīti sad-ācāreṇa darśayati |
yatra yadā bhagavataḥ śikṣayā karmāṇi kurvāṇā bhavanti, tadā śrī-kṛṣṇasya guṇa-nāmāni gṛṇanty anusmaranti ca kṛṣṇam ity arthaḥ |
iyaṁ ca bhagavac-chikṣā—
yat karoṣi yad aśnāsi yaj juhoṣi dadāsi yat | yat tapasyasi kaunteya tat kuruṣva mad-arpaṇam ||
[gītā. 9.27]
Jīva Gosvāmī
krama-sandarbhaḥ
katham ? tatrāha—kurvāṇā iti |
bhagavac-chikṣayā, yat karoṣi yad aśnāsi [gītā. 9.27] ity-ādikayā |
yatra bhagavat-santoṣaṇa-nimitte karmāṇy api kurvāṇās tādṛśa-ruci-svābhāvyenāsakṛt gṛṇantīty-ādi śrī-śaunakādivad iti bhāvaḥ ||
Viśvanātha Cakravartī
sārārtha-darśiṇī
evaṁ bhakti-miśreṇa karmaṇā bhakti-miśraṁ jñānaṁ mokṣa-sādhanaṁ bhavatīti uktam |
idānīṁ bhakti-miśra-niṣkāma-karmavatāṁ tādṛśa-bhakta-saṅga-bhāgyena keṣāñcit kadācit karma-miśrā bhaktir api bhaved ity āha—kurvāṇā iti |
yatra bhakti-miśra-karmaṇi sthitā akasmād bhakta-saṅga-bhāgyena bhagavac-chikṣayā karmāṇi kurvāṇāḥ santaḥ kecit kṛṣṇasya guṇa-nāmāni gṛṇanti smaranti ca kīrtana-smaraṇādy-ātmikāṁ bhaktiṁ kurvantīty arthaḥ |
bhagavac-chikṣā ceyam—
yat karoṣi yad aśnāsi yaj juhoṣi dadāsi yat | yat tapasyasi kaunteya tat kuruṣva mad-arpaṇam ||
[gītā. 9.27]
śikṣāyāś cāsyā bhakti-prakaraṇa-paṭhitatvāt na karmi-viṣayatayā vyākhyā yuktā |
karmiṇo hi karma-vaiphalyābhāvārthaṁ vaidikam eva karmārpayati |
bhaktās tu bhagavat-svāmikatvenaivātmānaṁ jānantaḥ sva-kartavyaṁ vaidikaṁ laukikaṁ daihikaṁ ca karma sva-prabhu-pravartyamānaṁ pratiyantaḥ sarvam eva tasmin samaprayantīti mahān bhedaḥ |
ata evātra yad aśnāsīty upanyastam, evam eva tatra śrī-rāmānujācārya-caraṇair api vyākhyātam |
atra kurvāṇā iti varatmāna-nirdeśāt |
bhaktiṁ kurvantīy ākhyāta-kriyāyā mukhyatvāc ceyaṁ karma-yoga-sahitā bhaktir ity ato bhakter asyāḥ karma-miśratā jñeyā |
karma-miśrayā bhaktyā sādhyā jñāna-miśratayā ca sādhyā mukti-sahitā bhagavad-ratiṁ śānta-bhakti-nāmnī ātmārāmāś ca munaya [bhā.pu. 1.7.10] ity āder jñeyā ||
Baladeva Vidyābhūṣaṇa
vaiṣṇavānandinī
yatrārpita-karmaṇi sthitāḥ pariniṣṭhita-saṅge yādṛcchike sati bhagavac-chikṣayā karmāṇi kurvāṇāḥ kṛṣṇasya guṇa-nāmāni gṛṇanty anusmaranti ca |
tac-chikṣā tu
yat karoṣi yad aśnāsi yaj juhoṣi dadāsi yat | yat-tapasyasi kaunteya tat kuruṣva mad-arpaṇam
[gīta 9.27]
saniṣṭhā vaidikam eva karmārpayanti, tat-prasaṅgāt pariniṣṭhitāḥ santo laukikaṁ daihikaṁ ca tad arpayantīti bhāvaḥ ||
← 1.5.351.5.37 →