Premabase · Śrīmad Bhāgavatam · Canto 1 · Chapter 5
Show
SanskritHindiEnglish
Script
IASTदेवनागरीবাংলা
Commentary
ŚrīdharaJīvaViśvanāthaBaladeva
ŚB 1.5.33
← 1.5.321.5.34 →
āmayo yaś ca bhūtānāṁ jāyate yena suvrata |
tad eva hy āmayaṁ dravyaṁ na punāti cikitsitam ||
Translation
— translation pending —
Commentary
Śrīdhara Svāmī
bhāvārtha-dīpikā
nanu saṁsāra-hetoḥ karmaṇaḥ kathaṁ tāpa-traya-nivartakatvam ? sāmagrī-bhedena ghaṭata iti sa-dṛṣṭāntam āha dvābhyām |
ya āmayo rogo yena ghṛtādinā jāyate, tad eva kevalam āmaya-kāraṇa-bhūtaṁ dravyaṁ tam āmayaṁ na punāti, na nivartayatīty arthaḥ |
kiṁ tu cikitsitaṁ dravyāntarair bhāvitaṁ sat punāty eva yathā ||
Jīva Gosvāmī
krama-sandarbhaḥ
nanu, utpattyaiva tat-tat-saṅkalpena vihitatvāt saṁsāra-hetoḥ karmaṇaḥ kathaṁ tāpa-traya-nivartakatvam ? ucyate—sāmagrī-bhedena ghaṭata iti, yathā—āmaya iti |
āmayo rogo yena ghṛtādinā jāyate, tad eva kevalam āmaya-kāraṇaṁ dravyam |
tam āmayaṁ na nivartayati, kintu cikitsitaṁ dravyāntarair bhāvitaṁ sat nivartayaty eva ||
[bhakti-sandarbha 220]
Viśvanātha Cakravartī
sārārtha-darśiṇī
nanu saṁsāra-hetoḥ karmaṇaḥ kathaṁ tāpa-traya-nivartakatvaṁ ? satyaṁ, sāmagrī-bhedena ghaṭata iti sa-dṛṣṭāntam āha dvābhyām |
ya āmayo rogaḥ yena ghṛtādinā jāyate, tad eva ghṛtādi-dravyaṁ cikitsitam auṣadhāntara-vāsitaṁ sat āmayaṁ na punāti na rakṣati, nāśayatīti yāvat |
punātir atra rakṣanārthako jñeyaḥ ||
Baladeva Vidyābhūṣaṇa
vaiṣṇavānandinī
nanu karmaṇas tāpaka-svabhāvasya kathaṁ tan-nivartakatvam ? tatrāha—yo rogo yena ghṛtādinā bhūtānāṁ prāṇināṁ jāyate, tad eva kevalam āmaya-janakaṁ ghṛtādi-dravyaṁ cikitsitam auṣadhāntara-vāsitaṁ sadāmayaṁ taṁ na punāti na rakṣati, vināśayaty eva, punātir iha rakṣaṇārthaḥ, dhātūnām anekārtha-svīkārāt ||
← 1.5.321.5.34 →