Premabase · Śrīmad Bhāgavatam · Canto 1 · Chapter 5
Show
SanskritHindiEnglish
Script
IASTदेवनागरीবাংলা
Commentary
ŚrīdharaJīvaViśvanāthaBaladeva
ŚB 1.5.32
← 1.5.311.5.33 →
etat saṁsūcitaṁ brahmaṁs tāpa-traya-cikitsitam |
yad īśvare bhagavati karma brahmaṇi bhāvitam ||
Translation
— translation pending —
Commentary
Śrīdhara Svāmī
bhāvārtha-dīpikā
tat sādhana-dharma-rahasyaṁ ca sūcitam ity āha—etad iti |
tāpa-trayasya ādhyātmikādeś cikitsitaṁ bheṣajaṁ nivartakam, sattva-śodhakam iti yāvat |
kiṁ tat ? bhagavati bhāvitaṁ samarpitaṁ yat karma, tat |
kathaṁ-bhūte bhagavati ? īśvare sarva-niyantari |
evam api ca brahmaṇy apracyuta-pūrṇa-rūpe ||
Jīva Gosvāmī
bhakti-sandarbhaḥ
tad eva karmārpaṇam upapādayati tribhiḥ—etad iti |
brahman ! he śrī-veda-vyāsa ! etat tāpa-trayasya cikitsitaṁ cikitsā, taiś cāturmāsya-vāsibhiḥ paramahaṁsaiḥ sūcitam |
kiṁ tat ? bhagavati karma yat samarpitaṁ bhavati |
tatra karma-samarpaṇam evety arthaḥ |
kathaṁ-bhūte ? svayaṁ bhagavati pūrṇa-svarūpaiśvaryādi-mattayā sarvāṁśiny eva |
kenacid aṁśena jīvādi-niyantṛtayā īśvare paramātma-śabda-vācye, svarūpa-bhūta-viśeṣaṇena vinā kevala-cin-mātratayā pratipādyatvena brahmani tac-chabda-vācye ||
[bhakti-sandarbha 219]
Jīva Gosvāmī
krama-sandarbhaḥ
tad evaṁ sva-carita-dvārā sarva-nirapekṣa-mahad-dvāraka-śrī-bhagavad-yaśaḥ-śravaṇam eva parama-śreyastvenoktam |
atra yat pūrvaṁ—idaṁ hi puṁsas tapasaḥ śrutasya vā [bhā.pu. 1.5.22] ity-ādinā tapa-ādi-janyam uttamaśloka-guṇānuvarṇanam uktam |
tat tu tasya tad-āsaktānāṁ tad-dvārāvirbhāvitvam eveti jñāpitam |
atha tasya tad apy upapādayituṁ sāmānyatas tāvat trividha-parama-tattvāvirbhāve samarpitasya karmaṇo māhātmyam āha—etad iti tribhiḥ |
saṁsūcitaṁ śāstrajñaiḥ |
īśvaraḥ paramātmā tasmin vā, bhagavati vā, brahmaṇi vā ity arthaḥ ||
Viśvanātha Cakravartī
sārārtha-darśiṇī
evaṁ ca nirguṇāṁ bhaktiṁ mayi prema-paryantāṁ pravartya anubhāvya ca bhakteḥ sākṣād-vācakaṁ bhagavad-uktaṁ śrī-bhāgavata-śāstraṁ copadiśya jñāna-kāraṇaṁ jñānaṁ ca mokṣa-paryojanakam ajijñāsave’pi mahyam |
samprati bālasyāsya vayo-vṛddhāv āyatyāṁ kadācit jijñāsā janiṣyate veti vibhāvya nairapekṣyarthaṁ bhaṅgyā jñāpitam ity āha—etad iti |
saṁsūcitaṁ na tu sākṣād uktaṁ, mat-prayojanābhāvad iti bhāvaḥ |
kiṁ tat ? tāpa-trayasya ādhyātmikādeś cikitsitaṁ bheṣajaṁ nivartakam |
tad eva kiṁ ? yat sva-svabhāvānusāreṇa īśvare paramātmani vā, bhagavati ṣaḍ-aiśvaravati vā, brahmaṇi tadīya-nirviśeṣa-svarūpe vā karmabhāvitaṁ samarpitam ||
Baladeva Vidyābhūṣaṇa
vaiṣṇavānandinī
śuddhāṁ bhaktiṁ tat-pratipādakaṁ śāstraṁ ca mayi pravartya nyūnatātra kācin mā bhūd iti niṣkāma-karma-yogaṁ ca vyañjann ity āha—etad iti |
saṁsūcitaṁ na tu sākṣād gaditaṁ mat-prayojanābhāvād ity arthaḥ |
kiṁ tat ? tāpa-trayasya cikitsitaṁ bheṣajaṁ nivartakaṁ, tad eva kiṁ? yat karma sva-varṇāśrama-vihitaṁ bhagavati bhāvitam arpitam ||
← 1.5.311.5.33 →