Premabase · Śrīmad Bhāgavatam · Canto 1 · Chapter 5
Show
SanskritHindiEnglish
Script
IASTदेवनागरीবাংলা
Commentary
ŚrīdharaJīvaViśvanāthaBaladeva
ŚB 1.5.26
← 1.5.251.5.27 →
tatrānvahaṁ kṛṣṇa-kathāḥ pragāyatām
anugraheṇāśṛṇavaṁ manoharāḥ |
tāḥ śraddhayā me’nupadaṁ viśṛṇvataḥ
priyaśravasy aṅga mamābhavad ruciḥ ||
Translation
— translation pending —
Commentary
Śrīdhara Svāmī
bhāvārtha-dīpikā
aśṛṇavaṁ śrutavān asmi |
me śraddhayā mamaiva svataḥ-siddhayā, na tv anyena balāj janitayā |
ato mama ity asyāpaunaruktyam |
anupadaṁ pratipadam |
priyaṁ śravo yaśo yasya tasmin ||
kaivalya-dīpikā : atha vairāgyaṁ saṁsāra-bhīrutā tattva-jñāna-vīta-rāga-pariśīlana-parameśvarānugraha-tapovana-vivikta-sevādi-vibhāvaṁ yama-niyamādhyātma-tattva-cintana-sarva-bhūta-samatva-darśana-parārtha-kāritvādy-anubhāvaṁ dhṛti-smṛti-mati-nirveda-harṣādi-vyabhicāriṇaṁ śama-sthāyi-bhāvaṁ śānti-rasam ārabhate—śānteti |
śānta-rase nāradaḥ—tatra ity-ādi |
tava muni-samīpe aśṛṇavaṁ śrutavān aham anupadaṁ pade pade |
padārtho’pi na tirohita ity arthaḥ |
priya-śravasi śrī-kṛṣṇe ratir bhaktiḥ |
śraddhayā me ratir mamety akṛtrimatārtham |
aṅga aho vyāsa ||
[mu.pha. 17.1]
Jīva Gosvāmī
krama-sandarbhaḥ
tatreti |
kṛṣṇa-kathāḥ śrī-nanda-nandanasya janmādi-līlāḥ |
yac chṛṇvato’paity aratir vitṛṣṇā [bhā.pu. 10.7.2] ity-ādeḥ |
priyaṁ sarveṣāṁ prīti-viṣayaṁ śravaḥ kīrtir yasya ||
Viśvanātha Cakravartī
sārārtha-darśiṇī
tāḥ śraddhayeti |
śraddhā-padenāsaktir daśamī bhūmikā |
anupadaṁ pratikṣaṇaṁ prati sup-tiṅ-antaṁ padaṁ vā me mama priyaṁ śravo yaśo yasya tasmin priya-śravasi kṛṣṇe mama ratir abhūd ity ato mamety asyāpaunaruktaṁ |
kṛṣṇe ratir ity ekādaśī ||
Baladeva Vidyābhūṣaṇa
vaiṣṇavānandinī
athāsaktiratī prāha—tatreti |
tāḥ kathāḥ śraddhayā bhaktyā, anupadaṁ pratikṣaṇaṁ priya-śravasi prema-janaka-kīrtau kṛṣṇe ratir abhavat |
me śraddhayā |
svato jātayā macchraddhayeti yojanānmam eti na punar uktiḥ ||
← 1.5.251.5.27 →