Premabase · Śrīmad Bhāgavatam · Canto 1 · Chapter 5
Show
SanskritHindiEnglish
Script
IASTदेवनागरीবাংলা
Commentary
ŚrīdharaJīvaViśvanāthaBaladeva
ŚB 1.5.21
← 1.5.201.5.22 →
tvam ātmanātmānam avehy amogha-dṛk
parasya puṁsaḥ paramātmanaḥ kalām |
ajaṁ prajātaṁ jagataḥ śivāya tan
mahānubhāvābhyudayo’dhigaṇyatām ||
Translation
— translation pending —
Commentary
Śrīdhara Svāmī
bhāvārtha-dīpikā
na ca tavācāryāpekṣā īśvarāvatāratvād ity āha—tvam iti |
he amogha-dṛk, tvam ātmanā svayam ātmānam ajam eva santaṁ jagataḥ śivāya prajātamavehi |
kutaḥ ? parasya puṁsaḥ kalām aṁśa-bhūtam |
tat tasmān mahānubhāvasya harer abhyudayaḥ parākramaḥ adhi adhikaṁ gaṇyatāṁ nirūpyatām ||
Jīva Gosvāmī
krama-sandarbhaḥ
tad eva viśiṣyāha—tvam iti |
he amogha-dṛk ! tvam ātmanā svayam ātmānaṁ svaṁ parasya puṁsaḥ kalām aṁśa-bhūtam avehi anusandhehi |
punaś ca jagataḥ śivāya adhunaiva śrī-kṛṣṇa-rūpeṇa yaś cājo’pi prajātas tam avehi |
tad etad dvayaṁ jñātvā mahānubhāvasya sarvāvatāri-vṛndebhyo’pi darśita-prabhāvasya tasya śrī-kṛṣṇasyaivābhyudayo līlā adhi adhikaṁ gaṇyatāṁ nirūpyatām |
svayam īśvaro’pi bhavān nijājñāna-rūpāṁ māyāṁ na prakaṭayatv iti bhāvaḥ ||
[śrī-kṛṣṇa-sandarbha 61]
Viśvanātha Cakravartī
sārārtha-darśiṇī
svayaṁ vedeti yad uktaṁ tad upapādayati—tvam iti |
he amogha-jñāna ! tat tasmāt mahānubhāvasya harer abhuyudayaḥ parama-maṅgalaṁ yaśaḥ adhikaṁ gaṇyatāṁ nirūpyatām ||
Baladeva Vidyābhūṣaṇa
vaiṣṇavānandinī
tad eva sphuṭayati—ātmanā svayam eva tvam ātmānam aiṣi |
he amogha-dṛk, laḍ-arthe loṭ, anyathā-moghadṛg ity asaṅgataṁ syāt |
kīdṛśam? ajam eva santaṁ jagataḥ śivāya prajātamāvirbhūtaṁ, yataḥ parasya puṁsaḥ kṛṣṇasya paramātmanaḥ kalāṁ bhāgaṁ svāṁśam ity arthaḥ |
tattato mahānubhāvasya tasyāṁśino'bhyudayo'dhigaṇyatāṁ prabhāvaśāli yaśo'dhikaṁ nirūpyatām |
tasyāvatāre śuddha bhakti-dānaṁ yathā mukhyaṁ prayojanantathā tavāpi bhūyād iti bhāvaḥ ||
← 1.5.201.5.22 →