satyaṁ tarhy acyute bhāva eva sarvotkṛṣṭatvena tavābhimataḥ sa ca tan-nāma-līlā-kīrtana-śravaṇādibhir eva bhavati |
tatra nāma rāma-kṛṣṇety ādi prasiddham eva |
līlā kīdṛśī tavābhimatā tām upadiśety apekṣāyām āha atho iti |
amogha-dṛk avyartha-jñānaḥ śuciḥ śuddhaṁ śravo yaśo yasya tathābhūto bhavān bhavati |
ataḥ satya-rato dṛḍha-vrataḥ san |
akhilānāṁ jīvānām akhilasya bandhasya vā muktaye |
tasya vividhaṁ ceṣṭitaṁ līlām |
samādhinā cittaikāgryeṇa smara |
līlā hi bhaktimati śuddhe citte svayam eva sphurati tasyāḥ sva-prakāśatvād anantatvād atirahasyatvād anyathā kenāpi vaktuṁ gṛhītaṁ cāśakyatvād iti bhāvaḥ |
tad evāmogha-dṛktvaṁ śuddha-yaśastvam anyathā naiveti bhāvaḥ |
yad vā, amoghe dṛśau netre yasya śucinī śravasī karṇau yasyeti kācil līlā netrābhyāṁ dṛṣṭā kācit karṇābhyāṁ śrutā ca tathā satya-rata iti dhṛta-vrata iti āsakti-niścaya-sūcitābhyāṁ mano-buddhibhyām api kācid atirahasya adṛṣṭāśrutāpy avakalitaiva sā sā samprati cittaikāgryeṇa smaryatāṁ smṛtvā ca varṇyatām atrānusmareti madhyama-puruṣo vākya-bhedāt ||