nanu purāṇeṣu pādmādiṣu bhagavad-yaśo varṇitam eva ? iti tatrāha—yatheti |
ca-kāro’py-arthe dharmādayo’pi vāsudeva-mahimato’tinikṛṣṭā api yathā arthā anukīrtitāḥ puruṣārthatvenoktās tathā vāsudevasya mahimā na varṇitaḥ |
puruṣārtha-śiromaṇir api puruṣārthatvenāpi na varṇitaḥ |
varṇito’pi bhūriśas tatra tatra tan-mahimā antato mokṣa-sādhanatvenoktaḥ |
ato’tyādaraṇīyasya vastunaḥ ādarābhāvaś cittasyāprasādam api kiṁ na karotv iti bhāvaḥ |
nanu, anyatra puṇya-tīrtheṣu muktir eva mahā-phalam |
muktaiḥ prārthyā harer bhaktir mathurāyāṁ ca labhyata iti |
brahma-bhūtaḥ prasannātmā na śocati na kāṅkṣati | samaḥ sarveṣu bhūteṣu mad-bhaktiṁ labhate parām ||
[gītā 18.55]
ity-ādibhis tatra tatra kvacin mokṣopary api bhaktir uktety ata āha—anv iti |
anv anu paunaḥ-punyena na varṇitaḥ |
ānandamayo’bhyāsāt [ve.sū. 1.1.13] ity atra abhyāsasyaiva śāstra-tātparya-jñāpakatvenoktatvāt |
ato bhagavan-mahimni eva phalatvenotkarṣe paunaḥ-punyena spaṣṭatayā yadā varṇayiṣyasi, tadaiva te citta-prasādo bhāvīti bhāvaḥ ||