Premabase · Śrīmad Bhāgavatam · Canto 1 · Chapter 4
Show
SanskritHindiEnglish
Script
IASTदेवनागरीবাংলা
Commentary
ŚrīdharaJīvaViśvanāthaBaladeva
ŚB 1.4.13
← 1.4.121.4.14 →
tat sarvaṁ naḥ samācakṣva pṛṣṭo yad iha kiñcana |
manye tvāṁ viṣaye vācāṁ snātam anyatra chāndasāt ||
Translation
— translation pending —
Commentary
Śrīdhara Svāmī
bhāvārtha-dīpikā
yat kiṁcana pṛṣṭo’si tat sarvaṁ no’smabhyaṁ samācakṣva |
yad yasmād vācāṁ viṣaye girāṁ gocare’rthe snātaṁ pāraṅgataṁ tvāṁ manye |
chandasād anyatra vaidika-vyatirekeṇa |
atrāvarṇikatvāt ||
Jīva Gosvāmī
krama-sandarbhaḥ
chāndasām iti veda-purāṇayoḥ brāhmaṇa-parivrājaka-nyāyavad bhedābheda-vyavasthayoktam |
mādhyandina-śrutau ca veda-purāṇetihāsānām apauruṣeyatvenābheda-nirdeśaḥ kṛtaḥ |
yathā—evaṁ vā are’sya mahato bhūtasya niḥśvasitam etad yad ṛg-vedo yajur vedaḥ sāma-vedo’tharvāṅgirasa itihāsaḥ purāṇaṁ vidyā upaniṣadaḥ [bṛ.ā.u. 2.4.10] ity-ādinā |
brahma-yajñādhyāyane’pi viniyogo dṛśyate’mīṣāṁ—yad brāhmaṇānītihāsa-purāṇāni ity anena ca praṇavādi-mayaṁ chandaḥ suparṇaṁ yad vākyam atrāsti, tatrāpi tasyādhikāritvaṁ darśitam |
kintv atra kaścid uccāro bhedako gamyaḥ |
yaḥ khalu svara-plutādi-vaiśiṣṭya-mayo vaidikas tad-abhāvāt |
na caivaṁ sūtādhikārāt purāṇādīnāṁ nyūnatvam āśaṅkyam |
sakala-nigama-vallī-sat-phale śrī-bhagavan-nāmni sarveṣām adhikārāt sarva-yajñādy-adhika-śrī-bhagavad-bhakty-antaravat śrī-bhāgavate tu ātmārāma-śiromaṇeḥ śrī-śukasyāpi sarvasvavad āveśāt ||
Viśvanātha Cakravartī
sārārtha-darśiṇī
snātaṁ pāragaṁ vaktum atisamartham ity arthaḥ |
chāndasād vaidikād vākyād anyatra tatrānadhikārād ity arthaḥ |
na caivaṁ sūtādhikārād vedebhyo’sya śāstrasya nyūnatvam āśaṅkyaṁ sakala-nigama-vallī-sat-phale bhagavan-nāmni sarveṣām adhikārāt |
nigama-kalpa-taroḥ phalam [1.1.3] iti, akhila-śruti-sāram [2.1.5] ity atraivokteḥ ||
Baladeva Vidyābhūṣaṇa
vaiṣṇavānandinī
tad iti—vācāṁ viṣaye gocare'rthe tvaṁ snātaṁ pāragaṁ vaktum iti samarthaṁ manye |
chāndasād vaidikād-vākyād anyatreti tatrānadhikārād ity arthaḥ |
nanv asyāpi śāstrasya vedaika-bhāgatvāt katham etad-vaktṛtvaṁ sūtasyeti cet? ucyate—agnyādhanāṅge vedam antre ratha-kārasyevetihāsa-purāṇa-bhāge vede'pi sūtasyādhikāro'stīti nigama iti padye vyākhyātamastīti nāsya nyūnatvaṁ, kintu śraiṣṭhyam eva, sarva-vedetihāsānāṁ sāraṁ sāraṁ samuddhṛtam ity ukteḥ ||
← 1.4.121.4.14 →