Śrīmad Bhāgavatam 1.3.11

Show

SanskritHindiEnglish

Script

IASTदेवनागरीবাংলা

Commentary

MadhvācāryaŚrīdharaJīvaViśvanāthaBaladeva

ŚB 1.3.11

ṣaṣṭham atrer apatyatvaṁ vṛtaḥ prāpto’nasūyayā |
ānvīkṣikīm alarkāya prahlādādibhya ūcivān ||

Translation

— translation pending —

Commentary

Madhvācārya

bhāgavata-tātparyam

ānvīkṣakīṁ tattva-vidyām |

ānvīkṣakī kutarkākhyā tathaivānvīkṣakī parā iti mātsye ||

Śrīdhara Svāmī

bhāvārtha-dīpikā

dattatreyāvatāram āha—ṣaṣṭham iti |

atrer apatyatvaṁ tenaiva vṛtaḥ san prāptaḥ atrer apatyam abhikāṅkṣata āha tuṣṭa [bhā.pu. 2.7.4] iti vakṣyamānatvāt |

kathaṁ prāptaḥ ? anusūyayā mat-sadṛśāpatya-miṣeṇa mām evāpatyaṁ vṛtavān iti doṣa-dṛṣṭim akurvann ity arthaḥ |

ānvīkṣikīm āṭma-vidyām |

prahrādādibhyaś ca |

ādi-padād yadu-haihayādyā gṛhyante ||

Jīva Gosvāmī

krama-sandarbhaḥ

atriṇā tat-sadṛśa-putrotpatti-mātraṁ prakaṭaṁ yācitaṁ [bhā.pu. 4.1.20] iti caturthādy-abhiprāyaḥ |

etad-vākyenānasūyayā tu kadācit sākṣād eva śrīmad-īśvarasyaiva putra-bhāvo vṛto’stīti labhyate |

uktaṁ ca brahmāṇḍa-purāṇe pativratopākhyāne—

anasūyābravīn natvā devān brahmeśa-keśavān | yūyaṁ yadi prasannā me varārhā yadi vāpy aham | prasādābhimukho bhūtvā mama putratvam eṣyatha ||

ānvīkṣikīm ātma-vidyām |

śrī-viṣṇor evāvatāro’yam ||

Viśvanātha Cakravartī

sārārtha-darśiṇī

anusūyayā atreḥ patnyā vṛtaḥ sann apatyatvaṁ prāptaḥ |

yad uktaṁ brahmāṇḍa-purāṇe pativratopākhyāne—

anasūyābravīn natvā devān brahmeśa-keśavān | yūyaṁ yadi prasannā me varārhā yadi vāpy aham | prasādābhimukho bhūtvā mama putratvam eṣyatha ||

ānvīkṣikīm ātma-vidyāṁ prahlādādibhyaś ca ||

Baladeva Vidyābhūṣaṇa

vaiṣṇavānandinī

dattātreyāvatāram āha—ṣaṣṭham iti |

anasūyayātreḥ patnyā vṛtaḥ sann apatyatvaṁ prāptaḥ |

evam uktaṁ brahmāṇḍe [pati-vratopākhyāne]

anasūyā-bravīnnatvā devān brahmeśa-keśavān | yūyaṁ madi prasannā me varārhā yadi vāpyaham | prasādābhimukhāḥ sarve mat-putratvam upeṣyatha

ānvikṣikīm ātma-vidyām ||