kim punaḥ ayam śāstrātideśaḥ : tṛcaḥ yat śāstram tat atidiśyate .

āhosvit rūpātideśaḥ : tṛcaḥ yat rūpam tat atidiśyate iti .

kaḥ ca atra viśeṣaḥ .

tṛjvat iti śāstrātideśaḥ cet yathā ciṇi tadvat .

tṛjvat iti śāstrātideśaḥ cet yathā ciṇi tadvat prāpnoti .

katham ca ciṇi .

uktam aṅgasya iti tu prakaraṇāt āṇgaśāstrātideśāt siddham iti .

āṅgam yat kāryam tat atidiśyate .

evam iha api anaṅguṇadīrghatvāni atidiṣṭāni raparatvam anatidiṣṭam .

tatra kaḥ doṣaḥ .

tatra raparavacanam .

tatra raparatvam na sidhyati tat vaktavyam .

na eṣaḥ doṣaḥ .

guṇe atidiṣṭe raparatvam api atidiṣṭam bhavati .

katham .

kāryakālam sañjñāparibhāṣam yatra kāryam tatra draṣṭavyam .

ṛtaḥ ṅisarvanāmasthānayoḥ guṅaḥ bhavati .

upasthitam idam bhavati uḥ aṇ raparaḥ iti .

evam tarhi ayam anyaḥ doṣaḥ jāyate .

āhatya tṛcaḥ yat śāstram tat atidiśyeta anāhatya vā iti .

kim ca ataḥ .

yadi āhatya dīrghatvam atidiṣṭam anaṅguṇaraparatvāni anatidiṣṭāni .

atha anāhatya anaṅguṇaraparatvāni atidiṣṭāni dīrghatvam anatidiṣṭam .

astu āhatya .

nanu ca uktam dīrghatvam atidiṣṭam anaṅguṇaraparatvāni anatidiṣṭāni iti .

na eṣaḥ doṣaḥ .

dīrghatve atidiṣṭe anaṅguṇaraparatvāni api atidiṣṭāni bhavanti .

katham .

upadhāyāḥ iti vartate na ca akṛteṣu eteṣu dīrghabhāvini upadhā bhavati .

kutaḥ nu khalu etat eteṣu vidhiṣu kṛteṣu yā upadhā tasyāḥ dīrghatvam bhaviṣyati na punaḥ kroṣṭoḥ yaḥ antaratamaḥ guṇaḥ tasmin kṛte avādeśe ca yā upadhā tasyāḥ dīrghatvam bhaviṣyati .

na ekam udāharaṇam yogārambham prayojayati iti .

tatra tṛjvadvacanasāmarthyāt eteṣu vidhiṣu kṛteṣu yā upadhā tasyāḥ dīrghatvam bhaviṣyati .

atha vā kim naḥ etena āhatya anāhatya vā iti .

āhatya anāhatya ca tṛcaḥ yat śāstram tat atidiśyate .

atha vā punaḥ astu rūpātideśaḥ .

atha etasmin rūpātideśe sati kim prāk ādeśebhyaḥ yat rūpam tat atidiśyate āhosvit kṛteṣu ādeśeṣu .

kim ca ataḥ .

yadi prāk ādeśebhyaḥ yat rūpam tat atidiśyate ṛkāraḥ ekaḥ atidiṣṭaḥ anaṅguṇaraparatvadīrghatvāni anatidiṣṭāni .

atha kṛteṣu ādeśeṣu ṛkāraḥ anatidiṣṭaḥ anaṅguṇaraparatvadīrghatvāni atidiṣṭāni .

ubhayathā ca svaraḥ anatidiṣṭaḥ na hi svaraḥ rūpavān .

astu prāk ādeśebhyaḥ yat rūpam tat atidiśyate .

nanu ca uktam ṛkāraḥ atidiṣṭaḥ anaṅguṇaraparatvadīrghatvāni anatidiṣṭāni iti .

na eṣaḥ doṣaḥ .

ṛkāre atidiṣṭe svāśrayāḥ atra ete vidhayaḥ bhaviṣyanti .

yat api ucyate ubhayathā ca svaraḥ anatidiṣṭaḥ na hi svaraḥ rūpavān iti sacakāragrahaṇasāmarthyāt svaraḥ bhaviṣyati .

rūpātideśaḥ iti cet sarvādeśaprasaṅgaḥ .

rūpātideśaḥ iti cet sarvādeśaḥ prāpnoti .

sarvasya tunantasya tṛśabdaḥ ādeśaḥ prāpnoti .

siddham tu rūpātideśāt .

siddham etat .

katham .

rūpātideśāt .

rūpātideśaḥ ayam .

nanu ca evam eva kṛtvā codyate rūpātideśaḥ iti cet sarvādeśaprasaṅgaḥ iti .

siddham tu pratyayagrahaṇe yasmāt saḥ tadāditadantavijñānāt .

siddham etat .

katham .

pratyayagrahaṇe yasmāt saḥ vihitaḥ tadādeḥ tadantasya ca grahaṇam bhavati iti evam tunantasya tṛjantaḥ ādeśaḥ bhaviṣyati .

evam api kim cit eva tṛjantam prāpnoti .

idam api prāpnoti paktā iti .

āntaratamyāt ca siddham .

kroṣṭoḥ yat antaratamam tat bhaviṣyati .

kim punaḥ tat .

kruśeḥ yaḥ tṛc vihitaḥ tadantam .

tṛjvadvacanam anarthakam tṛjviṣaye tṛcaḥ mṛgavācitvāt .

tṛjviṣaye etat tṛjantam mṛgavāci .

tunaḥ nivṛttyartham tarhi idam vaktavyam .

tunaḥ sarvanāmasthāne nivṛttiḥ yathā syāt .

tunaḥ nivṛttyartham iti cet siddham yathā anyatra api .

tunaḥ nivṛttyartham iti cet tat antareṇa vacanam siddham yathā anyatra api aviśeṣavihitāḥ śabdāḥ niyataviṣayāḥ dṛśyante .

kva anyatra .

tat yathā .

gharatiḥ asmai aviśeṣeṇa upadiṣṭaḥ saḥ ghṛtam , ghṛṇā , gharmaḥ iti evaṃviṣayaḥ .

raśiḥ asmai aviśeṣeṇa upadiṣṭaḥ saḥ rāśiḥ , raśmiḥ , raśanā iti evaṃviṣayaḥ .

luśiḥ asmai aviśeṣeṇa upadiṣṭaḥ saḥ loṣṭaḥ iti evaṃviṣayaḥ .

idam tarhi prayojanam vibhāṣā vakṣyāmi iti .

vibhāṣā tṛtīyādiṣu aci iti .

vāvacanānarthakyam ca svabhāvasiddhatvāt .

vāvacanam ca anarthakam .

kim kāraṇam .

svabhāvasiddhatvāt .

svabhāvataḥ eva tṛtīyādiṣu ajādiṣu vibhaktiṣu tṛjantam ca tunantam ca mṛgavāci iti